Ikipe ya Real Madrid yatsinze mukeba wayo w'ibihe byose imusanze iwe ihita yongera kuyobora urutonde rw'agateganyo rwa La liga yari yakuweho na Girona nayo y'i Barcelona.
Ni umukino w'umunsi wa 11 wa shampiyona ya La liga wari utegerejwe n'abatari bake mu mpande enye zose z'isi, ukaba wabereye kuri Estadio Olimpico Lluis Companys aho ikipe ya FC Barcelona iri kwakirira imikino yayo muri uyu mwaka w'imikino.
Uyu mukino wagiye kuba ikipe ya Real Madrid ihabwa amahirwe menshi yo kuwutsinda bitewe n'uko Barcelona yari ifite abakinnyi benshi bakomeye bavunitse, barimo nka Lewandowski na Raphinha bari bagarutse ariko babanje hanze, mu gihe Frenkie De Jong, Jules Koundena Pedri bo batari bahari.
FC Barcelona yatangiye uyu mukino neza ifungura amazamu ku munota wa gatandatu gusa ku gitego cyatsinzwe na Ilkay Gundogan kubera amakosa ya ba myugariro ba Real Madrid, ndetse ikomeza kwataka ihusha uburyo bwinshi ariko igice cya mbere kirangira gutya.
Mu gice cya kabiri umutoza wa Real Madrid Carlo Ancelotti yakoze impinduka azana mu kibuga Camavinga, Modric na Joselu bahinduye umukino, ikipe ya FC Barcelona itangira kotswa igitutu.
Ibi byaje gutuma ku Real Madrid ifungura amazamu ku gitego cyatsinzwe na Jude Bellingham nyuma yo guhererekanya umupira na bagenzi be igihe kinini, aba Barcelona badakoraho.
Muri iyi minota Real Madrid yakomeje kwataka ishaka igitego cya kabiri, ariko n'aba Barcelona bakanyuzamo bashaka igitego cya kabiri baje no kubona uburyo imbere y'izamu ariko umupira Inigo Martinez awutera ipoto.
Mu gihe baganaga ku musozo ubwo umusifuzi yari yamaze kongeraho iminota ine ngo umukino urangire, nibwo Luka Modric yahinduye umupira usanga Jude Bellingham ahagaze neza imbere y'izamu ahita atsinda igitego cya kabiri.
Iyi ntsinzi yatumye Real Madrid yongera gufata umwanya wa mbere n'amanota 28 inganya na Girona, mu gihe FC Barcelona yagumye ku mwanya wa gatatu ifite amanota 24.
Ibitego bibiri bya Jude Bellingham byafashije Real Madrid kubona amanota atatu
