Bruno Fernandes yavuze umukinnyi ukina hagati wamukomereye kuva yagera muri Premier league utari N'Golo Kante mu gihe abantu benshi bari biteze ko avuga uyu mufaransa ukinira ikipe ya Chelsea.
Uyu munya-Portugal yageze muri Manchester United mu kwa mbere 2020 ndetse yabaye umwe mu bakinnyi bakomeye muri Premier league, aho yakinnyemo imikino 78, ibitego 35 akanatanga imipira yavuyemo ibitego 25.
Ubwo Manchester United yari imaze gutangaza ko uyu mugabo yongereye amasezerano ndetse akaba ubu ari umwe mu bahembwa menshi muri iyi kipe, abafana bahawe amahirwe ku mbuga nkoranyambaga ze yo kumubaza uko ubuzima muri iyi kipe bumeze.
Mu gihe yarimo abazwa agasubiza kuri twitter Bruno Fernandes yavuze Kevin De Bruyne ukinira Manchester City, ubwo yari abajijwe umukinnyi wo hagati bahuye ugoranye cyane muri Premier league.
Fernandes avuga ko De Bruyne ariwe mukinnyi wo hagati wamugoye cyane(Image:Gatty)
Bruno Fernandes amaze guhura na Kevin De Bruyne imikino itandatu mu marushanwa yose, Bruno na bagenzi be batsinzemo umwe, banganya kabiri batsindwa imikino itatu. Muri iyo mikino kandi Bruno Fernandes yatsinzemo igitego kimwe, mu gihe Kevin De Bruyne yatsinzemo ibitego bibiri byose yatsinze mu mukino Man.City iheruka kunyagiramo Man.Utd ibitego 4-1.
Byari byitezwe ko Fernandes avuga N'Golo Kante(SciSports)
Naho ku ruhande rwa N'Golo Kante bamaze guhura imikino itandatu mu marushanwa yose, buri ruhande rutsinda umukino umwe banganya imikino ine. Muri iyi mikino nta gitego Bruno Fernandes yatsinze, mu gihe N'Golo Kante yatsinze igitego kimwe ubwo Ubufaransa bwatsindaga Portugal mu 2020 muri Nations league.
