Mu 1996 nibwo ikipe ya FC Barcelona yatangiye ihangana ryayo na Bayern Munich muri UEFA Champions league dore ko aya makipe akunze guhura inshuro nyinshi.
Muri uwo mwaka aya makipe yombi yakinnye umukino ubanza n'uwo kwishyura. Muri Esipanye Bayern Munich yatsinze FC Barcelona 2-1, mu gihe zari zanganyirije mu Budage ku kibuga cya Bayern Munich.
Kuva icyo gihe kugeza ubu, FC Barcelona ntabwo izi uko gutsinda Bayern Munich muri Champions league bimera. Inshuro imwe yonyine Barcelona yatsindiye Bayern Munich iwayo hari mu 2011 muri Audi cup, igikombe gitegurwa na Bayern Munich bitegura umwaka mushya w'imikino.
Usibye uwo mukino, aya makipe yakinnye iyindi mikino 14, Bayern Munich itsindamo imikino 10, Barcelona itsindamo 2 banganya umukino umwe wonyine.
Ab'i Barcelona bahize bavuga ko uyu ariwo mwanya babonye wo gutsindira Bayern Munich iwayo, dore ko ikunze kubandagaza cyane muri UEFA Champions league. Ubaze imikino itatu iheruka guhuza aya makipe wasanga Bayern Munich yaratsinzemo ibitego 14 kuri 2 bya FC Barcelona kuko Bayern Munich yanayitsinze yose.
Mu mwaka ushize w'imikino ubwo aya makipe nabwo yari mu itsinda rimwe, umukino wo kwishyura FC Barcelona yatsinzwemo na Bayern Munich 3-0, niwo watumye FC Barcelona ihita yerekeza muri Europa league.
Gusa ni FC Barcelona ije muri uyu mwaka w'imikino itandukanye n'uko yari imeze mu mwaka w'imikino ushize. Iyi kipe yasinyishije abakinnyi nka Raphinha, Christensen, Kessie, Kounde, na rutahizamu Robert Lewandowski wavuye muri iyi Bayern Munich.
Ibi byafashije FC Barcelona gutangira umwaka w'imikino neza kuko ifite amanota 12 kuri 15 muri La liga, mu gihe Bayern Munich yo ifite amanota 12 kuri 18 yagakwiye kubona muri Bundesliga, ndetse ikaba imaze imikino itatu inganya.
N'ubwo bigaragara ko FC Barcelona ihagaze neza muri iyi minsi kurenza Bayern Munich, hari ingingo nyinshi zishobora gutuma umufana wa FC Barcelona agira ubwoba budasanzwe.
Usibye kuba FC Barcelona isanzwe ari insina ngufi imbere ya Bayern Munic cyane cyane iyo ari imikino yabereye mu Budage, Bayern Munich yo muri Champions league iba iteye ubwoba.
Bayern Munich imaze imikino 39 idatakaza ku mikino yo mu matsinda ya UEFA Champions league yakiriye ku kibuga cyayo Allianz Arena. Iyi kipe kandi mu mikino 24 ya UEFA Champions league iheruka kwakira, yatsinzemo 23 inganya umwe gusa.
Aya makipe yombi agiye guhura mu mukino w'umunsi wa kabiri mu itsinda C, aho yombi yatsinze imikino yayo ya mbere. Bayern Munich yatsinze Inter Milan 2-0 mu cyumweru gishize, naho FC Barcelona itsinda Victoria Plzen 5-1.
Uyu mukino uraza gutangira saa 21:00 ku masaha yo mu Rwanda ku kibuga cya Bayern Munich aricyo Allianz Arena, usifurwe n'umuhorandi witwa Danny Makkelie.
