Sergio Aguero yahawe amahirwe yo kugaruka muri Manchester City nyuma yo guhagarika gukina umupira w'amaguru imburagihe

Sergio Aguero yahawe amahirwe yo kugaruka muri Manchester City nyuma yo guhagarika gukina umupira w'amaguru imburagihe

 Dec 18, 2021 - 19:08

Manchester City ni umwe mu miryango ine yafunguwe Aguero yakwinjiramo nyuma yo guhagarika gukina kubera indwara y'umutima.

Sergio kun Aguero wabaye umunyabigwi w'ikipe ya Manchester City, iyi kipe irashaka kumugira ambasaderi wayo nyuma yo guhagarika gukina umupira w'amaguru ku myaka 33 kubera indwara y'umutima.

Kuri uyu wa Gatatu i Camp Nou, nibwo Sergio Aguero mu marira menshi yemeje ko abaganga bamugiriye inama yo guhagarika gukina ruhago kuko arwaye umutima.

Ni inkuru yababaje abakunzi b'umupira w'amaguru ku isi harimo n'amakipe yanyuzemo. Aguero ubu afite guhitamo mu kazi gaturutse mu mpande enye ako yakora nyuma yo guhagarika gukina, muri aka kazi hakaba harimo n'aka Manchester City yanyuzemo.

Nyuma yo kumara imyaka icumi mu ikipe ya Manchester City, mu mpeshyi ishize nibwo Aguero yerekeje muri FC Barcelona ku buntu kuko yari yasoje amasezerano muri Manchester City.

Ikinyamakuru kitwa Ole cyo muri Argentine nicyo cyatangaje ko ikipe ya Manchester City yaba yamaze gutegura ubusabe bwayo ko umunyabigwi wayo Sergio kun Aguero yayibera ambasaderi mpuzamahanga bityo ntabe umushomeri.

Ku rundi ruhande Marca yandikira muri Eapagne nayo iravuga ko hari akandi kazi gaturuka ahantu hatatu kiyongera ku ka Manchester City nako gateganya guhabwa Sergio Aguero.

Akazi ka mbere usibye aka Manchester City, muri Argentine iwabo baba batangiye gutekereza ko uyu wahoze ari rutahizamu yaba umutoza w'imwe mu makipe y'igihugu ya Argentine ariko mu batoya.

Gusa niba Sergio Aguero adashaka guhita ajya mu kazi k'amakipe yaba n'iy'igihugu, biravugwa ko uyu mugabo yahabwa akazi ko kuri televiziyo akaba umu-pundit(abatanga ibitekerezo ku mikino itandukanye).

Mu myaka icumi Sergio Aguero yamaze mu ikipe ya Manchester City yavuyemo atwaye ibikombe icumi ndetse ubu nta mukinnyi watsinze ibiego byinshi muri iyi kipe kurusha Aguero kuva iyi kipe yabaho.

Mu mikino 390 yakiniye Manchester City, yatsinze ibitego 260 ndetse ubu ni umwataka wa kane mu bataka b'ibihe byose ba Premier league aho yatsinze ibitego 184.

Gusa n'ubwo hari ibi byose, ntibizwi neza niba Sergio Aguero hari akazi azahitamo kuko bivugwa ko yifuza kubanza gufata igihe akaruhuka neza akabona kugira ibindi ajyamo.

Sergio kun Aguero yakinnye iminota 165 yonyine mu ikipe ya FC Barcelona nyuma yo kuyijyamo mu mpeshyi akibasirwa n'imvune zatunye adatangira neza umwaka w'imikino.

Sergio Aguero yamaze imyaka 10 muri Manchester City(Image:Daily mail)

Aguero ntibyamuhiriye muri FC Barcelona(Image:Marca)