Minisiteri y’ubuzima imaze gutangaza ko mu minsi 12 yonyine ishize mu Rwanda ubwandu bwa COVID19 bwazamutse bikabije ndetse n’abapfa bariyongera.
Imibare itangwa n’inzego z’ubuzima yerekana ko muri iyo minsi hamaze gupfa abantu 134. Abanduye bo ni 9,102.
Mu ijoro ryakeye hatangajwe abantu 22 bishwe na Covid-19 umubare munini mushya wa benshi bapfuye ku munsi umwe kuva iki cyorezo cyahagera.
U Rwanda rwugarijwe n’inkubiri nshya ya Coronavirus mu cyumweru gishize minisitiri w’ubuzima yavuze ko babonye ibimenyetso by’ubwoko bwayo bwa Delta.
Mu minsi irindwi ishize, habonetse abantu 5,620 bashya banduye n’abantu 103 bapfuye. Ikindi cyumweru kiruta ibindi mu mibare.
Mu cyumweru gishize, umunyamabanga wa leta ushinzwe ubuzima yabwiye televiziyo y’u Rwanda ko "…abarwayi babaye benshi, ahari harafunzwe ubu twarahafunguye kandi hose haruzuye, abarembye bararembye n’abapfa barapfa ari benshi…"
Dr Tharcisse Mpunga, yagize ati: "Iki ni igihe tutigeze tugeramo kuva twaterwa n’iki cyorezo".
Imibare y’abamaze kwandura bose mu Rwanda igiye kugera kuri 50,000, naho abamaze gupfa bose 582 - aba biyongereyeho 200 mu minsi 21 ishize.
Ishusho y’ijoro ryakeye
Minisiteri y’Ubuzima mu Rwanda yatangaje ko ku wa Kabiri tariki 13 Nyakanga 2021, mu Rwanda abantu 792 babasanzemo Covid-19, muri bo 306 bakaba babonetse i Kigali. Abakize ni 1211, abantu 16 bitabye Imana, naho abarembye ni 73 nk’uko imibare yatangajwe ibigaragaza.
Abitabye Imana ni abagore barindwi b’imyaka 77, 75, 61, 58 (Kigali), 72 (Rubavu), 62 (Muhanga) n’uw’imyaka 42 (Rusizi) n’abagabo icyenda b’imyaka 95 (Muhanga), 81, 74, 64, 55, 38 (Kigali), 78, 74 (Musanze) n’undi w’imyaka 58 (Rusizi), bakaba bahise buzuza umubare w’abantu 598 bamaze kwicwa n’iki cyorezo mu Rwanda.
Abarimo kuvurwa bose hamwe ni 14,643.
Inzego zishinzwe ubuzima zisaba Abaturarwanda baba abakingiwe n’abatarakingirwa gukomeza kwitwararika birinda kwandura cyangwa kwanduza abandi icyorezo cya COVID-19 gikomeje kugaragaza ubukana mu Rwanda n’ahandi ku isi.
