Umuvugizi wa Polisi y’u Rwanda, CP John Bosco Kabera, yatangaje ko Polisi y’u Rwanda yamenye ikibazo cy’ibura ry’umusizi Innocent Bahati ihawe amakuru na RIB ndetse ko mu minsi ya vuba hazatangazwa amakuru yavuye mu iperereza.
Mu ntangiriro za 2021 nibwo hatangiye kuvugwa amakuru ajyanye n’ibura ry’umusizi Bahati. Bivugwa ko yaburiye mu Ntara y’Amajyepfo mu Karere ka Nyanza.
CP John Bosco Kabera yabwiye Itangazamakuru ko ikibazo cy’ibura rya Bahati Polisi yakimenye ihawe amakuru n’Urwego rw’Ubugenzacyaha, RIB.
Ati “Icyo twavuga ni uko Polisi kuva iki kibazo cyamenyekana yagikurikiranye. Mu iperereza yakoze hari amakuru atandukanye yagiye aboneka azatangazwa mu minsi ya vuba.”
RIB yabwiye itangazamakuru ko tariki 9 Gashyantare 2021 ari bwo yakiriye ikirego gisaba gushakisha Bahati cyatanzwe kuri Station ya Busasamana mu Karere ka Nyanza.
Umuvugizi wa RIB, Dr Murangira B. Thierry, ati:“Ikirego cyarakiriwe, RIB yahise itangira iperereza. Ndakeka mu cyumweru kimwe cyangwa bibiri, raporo y’iperereza izaba yabonetse. Twazabagezaho icyo iperereza ryagezeho.”
Umusizi Junior Rumaga wari asanzwe abana na Bahati Innocent avuga ko yamubuze kuva i 07/02/2021, agatanga ikirengo taliki 09/02/ 2021 ariko kugeza ubu yakomeje kuburirwa irengero.
Umusizi Bahati Innocent yamenyekanye nka Rubebe kubera igisigo cyitwa gutyo aza gukundwa mu bindi birimo ‘Imana ya Sembwa', 'Urwandiko rwa Bene Gakara', Ubusa bwa simba’ n'icyo aheruka gusohora yise 'Mfungurira'.
Umwaka urashize umusizi Bahati Innocent aburiwe irengero.
Junior Rumaga aracyashengurwa n’ibura ryuwo yitaga umuvandimwe we Bahati Innocent.
View this post on Instagram
Umva igisigo cya Bahati Innocent yise Rubebe.
