Iyi kipe ikina Shampiyona mu cyiciro cya mbere mu gihugu cya Sudan y'Epfo, yavuzwe igihe kirekire kuri uyu musore cyane ko yamaze no gusoza amasezerano, amakuru akemeza ko banumvikanye mbere y'uko uyu mwaka w'imikino urangira.
Ku rukuta rwayo rwa Facebook Jamus SC, yagize iti: "Nshuti bakunzi bafana ba Jamus SC, tubatumiye kuza kwifatanya natwe ku isaha ya saa kumi (16h00 PM) ku kibuga Mpuzamahanga cy'indege cya Juba mu guha ikaze ikirangirire cyacu kivuye mu Rwanda. Muhire Kevin ni impano idasanzwe ikina hagati mu kibuga, akaba avuye mu ikipe ya Rayon Sports yo mu Rwanda."
Muhire Kevin ni umwe mu bakinnyi bitwaye neza umwaka ushize w'imikino, aho yatanze imipira irenga 10 yavuyemo ibitego, yahamagawe mu ikipe y'igihugu y'u Rwanda haba inkuru ndetse n'iy'abakina imbere mu bihugu byabo 'CHAN'.
Iyi Jamus SC Juba agomba gukinira umwaka utaha w'imikino ni imwe mu makipe akomeye muri iki igihugu ndetse iri mu zifite amafaranga n'ubushobozi ugereranyije n'izindi zo muri iki gihugu.
Abandi bakinnyi iyi kipe iheruka gusinyisha!
Martin Otwao: Umunya-Sudan y'Epfo wakuwe mu ikipe ya Kator SC Juba, yasinye imyaka ibiri y'amasezerano.
Hassan Sempewo wasswa: Myugariro w'Umugande wakuwe mu ikipe ya Kator SC, imyaka ibiri y'amasezereno n'iyo yasinye.
Madut Chol: Myugariro wo mu mutima w'ubwugarizi wakuwe mu ikipe ya Amarat United FC Juba, yasinye imyaka ibiri.
Muhire Kevin yari Kapiteni wa Rayon Sports mu mwaka urangiye w'imikino
Muhire Kevin ahamagarwa mu ikipe y'igihugu y'u Rwanda mu buryo buhoraho mu nkuru ndetse n'iya bakina imbere mu bihugu byabo
