Real Madrid yegukanye Copa del Rey

Real Madrid yegukanye Copa del Rey

 May 6, 2023 - 20:15

Ikipe ya Real Madrid yegukanye igikombe cya Copa del Rey nyuma yo gutsinda Osasuna ku mukino wa nyuma.

Ku isaha ya saa 22:00 kuri uyu wa Gatandatu nibwo José María Sánchez Martínez yari atangije uyu mukino wabereye kuri Estadio de la Cartuja iherereye mu mujyi wa Sevilla.

Real Madrid yageze ku mukino wa nyuma yigijeho mukeba wayo FC Barcelona yatsinze ibitego bine ku busa nyuma y'uko nayo yari yatsinzwe kimwe ku busa mu mukino ubanza, mu gihe Osasuna yo yageze ku mukino wa nyuma yigijeyo Athletic Bilbao.

Benshi mu bakunzi ba ruhago bari bafite impungenge ku buryo Real Madrid iraza kwitwara imbere ya Osasuna, mu gihe iri kwitegura umukino karundura wa kimwe cya kabiri cya Champions League ifitanye na Manchester City ku wa Kabiri.

Real Madrid yinjiye mu mukino neza kuko ku munota wa gatatu gusa yari imaze kubona igitego cya mbere cyatsinzwe na Rodrygo Goes wahawe umupira na Vinicius Junior.

Abasore ba Real Madrid bahise boroshya ibintu bagabanya kwataka cyane byatumye Osasuna ibotsa igitutu, ariko abahungu ba Carlo Ancelotti babashije kurinda izamu bajya kuruhuka bayoboye.

Bavuye kuruhuka abasore b'ikipe ya Osasuna bakomeza kwataka izamu ryari ririnzwe na Thibaut Courtois, ndetse baza kubona igitego cyo kwishyura cyatsinzwe na Lucas Torro ku munota wa 58.

Iki gitego cyatumye Real Madrid yongera gushyiramo agatege irataka kugira ngo irebe ko yabona igitego cya kabiri igenda inahusha uburyo, ariko ku munota wa 70 Rodrygo atsinda igitego cya kabiri ari nacyo cyasoje umukino.

Real Madrid yegukanye igikombe cya Copa del Rey byitezwe ko ari nacyo izatwara muri uyu mwaka w'imikino mu bikombe bikinirwa muri Espagne, kuko kuri shampiyona FC Barcelona isa n'iyamaze kuyisiga.

Gusa iyi kipe iracyafite amahirwe menshi kuri UEFA Champions League y'uyu mwaka dore ko ari imwe mu makipe ane yageze muri kimwe cya kabiri, aho izahura na Manchester City yo mu Bwongereza.

Umukino ubanza uzaba ku wa Kabiri tariki 09 Gicurasi 2023 ku kibuga cya Real Madrid Santiago Bernabeu, naho uwo kwishyura ukinwe tariki 16 Gicurasi 2023 kuri Etihad Stadium.

Real Madrid yatahanye intsinzi

Lucas Torro watsinze igitego cyo kwishyura