Ni umukino wabaye mu ijoro ryo kuri uyu wa kabiri aho kuri stade Estadio do Dragao muri Portugal, ikipe y'igihugu ya Portugal yatanaga mu mitwe n'ikipe y'igihugu ya Macedonia y'amajyaruguru.
Ni ikipe y'igihugu ya North Macedonia yakanze abantu cyane mu cyumweru gishize ubwo yatsindaga ikipe y'igihugu y'Ubutariyani iyisanze ku butaka bwayo, ndetse ikaba yaranatsinze Ubudage ubwo bari bakiri mu matsinda nayo iyisanze iwayo.
Cristiano Ronaldo na bagenzi be bari baburiwe(Net-photo)
Nyuma y'uko iyi North Macedonia yari imaze gutsinda Ubutariyani, Perezida wabo witwa Stevo Pendarovski yatanze ubutumwa bushimira abahungu be, ariko yongeraho amagambo yo kuburira Cristiano Ronaldo na bagenzi be ko batazoroherwa n'uyu mukino.
Abakunzi ba ruhago bari bategreje kureba niba koko ikipe y'igihugu ya Portugal barayongera ku Budage n'Ubutariyani, ariko siko byagenze kuko bayiciye hejuru baguruka.
Ikipe y'igihugu ya Portugal yatsinze ibitego bibiri ku busa byose byatsinzwe na Bruno Fernandes usanzwe akinira Manchester United. Icya mbere yagitsinze ku munota wa 32 ku mupira yari ahawe na Cristiano Ronaldo, naho icya kabiri agitsinda ku munota wa 65 ku mupira yahawe na Diogo Jota.
Ibitego bya Bruno Fernandes byatumye Portugal ibona itike(Net-photo)
Indi kipe yabonye itike yo kujya mu gikombe cy'isi ku mugabane w'Uburayi ni Poland yatsinze Sweden ibitego bibiri ku busa. Ibitego byatsinzwe na Robert Lewandowski na Piotr Zielinski nibyo byatumye Poland ibona iyi tike.
Bivuze ngo ubu amakipe 12 mu makipe 13 azahagararira umugabane w'Uburayi mu gikombe cy'isi amaze kumenyekana, mu gihe indi izava hagati ya Scotland na Ukraine zizakina mu kwa gatandatu, itsinze igakina na Wales ubundi itsinze ikajya mu gikombe cy'isi.
