Rutahizamu w'ikipe ya Celta Vigo witwa Iago Aspas yashinje umusifuzi Pablo Ganzalez kuba yaragurishije umukino baherutse gutsindwamo na Real Madrid ibitego 2-1, aho ngo yakoraga uko ashoboye ngo iyi kipe ibone ibitego.
Karim Benzema yatsinze ibitego bibiri byatumye Real Madrid itsinda Calta Vigo ikomeza kwanikira amakipe ayikurikiye arimo FC Barcelona, ariko nyuma hakurikira amagambo menshi kubera penariti eshatu iyi kipe yahawe muri uyu mukino.
Benzema yatsinze ibitego bibiri(Image:AFP)
Mu gice cya mbere Karim Benzema yatsinze penariti ya mbere ariko birangira Nolito atsinze igitego cyo kwishyura, bajya kuruhuka ari igitego 1-1.
Mu gice cya kabiri Jeison Murillo yakoreye ikosa Rodrygo mu rubuga rw'amahina Karim Benzema atera indi penariti, ariko noneho umuzamu Mathias Dituro ayikuramo. Irindi kosa ryakozwe na Kevin Vasquez rikorerwa Ferland Mendy, noneho Benzema arayinjiza.
Nyuma rutahizamu wa Celta Vigo witwa Iago Aspas yagize ati:"Ubanza gusa [umusifuzi] yari akeneye gusifura ngo yiterere penariti ya kane. Ibitego bitatu bya Benzema bigaragara ko aricyo cyari kimuraje ishinga."
Aspas avuga ko umusifuzi yashakiraga Real Madrid ibitego(Image:Daily mail)
Iyi ntsinzi yatumye Real Madrid irushaho kwegera igikombe cyayo cya kabiri mu myaka itatu n'ubwo FC Barcelona yaraye itsinze FC Sevilla, Real Madrid irayirusha amanota 12.
