Producer Made Beats yimukiye i Manchester aherekejwe n’abarimo Junior Giti

Producer Made Beats yimukiye i Manchester aherekejwe n’abarimo Junior Giti

 Sep 20, 2022 - 05:11

Producer Made Beats umaze kuba ubukombe mu mwuga wo gutunganyiriza abahanzi indirimbo mu buryo bw’amajwi mu Rwanda no muri Africa y’iburasirazuba, yimukiye mu Bwongereza aherekezwa n’inshuti ze.

Ku munsi w’ejo kuwa Mbere tariki 19 Nzeri 2022 mu masaha y’umugoroba, nibwo Mucyo David umaze kubaka izina nka Made Beats yimukiye mu gihugu cy’u Bwongereza aho agiye gutura mu mujyi wa Manchester uzwi cyane mu mupira w’iki gihugu giherereye ku mugabane w’u Burayi.

Made Beats yaherekejwe n’inshuti ze zirimo Junior Giti, Dj Pius n’abandi bake bamugejeje ku kibuga cy’indege mpuzamahanga cya Kigali, i Kanombe.

Made Beats agiye mu Bwongereza yari amaze iminsi ari producer wihariye wa Bruce Melodie binyuze muri kompanyi 1:55 am aba bombi bakorana nayo irebererwa na Coach Gael.

Izina Made Beats ryavuzwe cyane mu matwi y’abanyarwanda mu mwaka wa 2017 ubwo yakoraga indirimbo zitandukanye zakunzwe zirimo “Thank you” ya The Ben na Tom Close yabiciye bigacika, “You Got it” ya Safi Madiba na Meddy n’izindi zatumye aba igihangange mu mwuga wo gutunganya amajwi y’indirimbo mu Rwanda.

Made Beats kandi yatangiye gukorera indirimbo abahanzi bo muri Africa y’iburasirazuba ubwo babaga bahuje imbaraga n’abanyarwanda. Made Beats yakoze indirimbo “We don’t care” yahurije hamwe Meddy, Rayvanny na RJTheDj, “Nyoola” ya Bruce Melodie na Eddy Kenzo’ “Sawa Sawa” ya Bruce Melodie na Khaligraph Jones, “Totally Crazy” Bruce Melodie yakoranye na Harmonize n’izindi.

Made Beats avuga ko kuba yimukiye muri iki gihugu kuko afite ibyangombwa byo kubayo ariko na none ari amahirwe agize yo kuzamura urwego rw’imikorere n’imigenzereze y’umuziki akora ndetse ko bizatuma umuziki nyarwanda uba mwiza kurushaho.

Inshuti za Made Beats zirimo Junior Giti, Dj Pius n’abandi bamuherekeje ubwo yari agiye mu Bwongereza.

Made Beats yari aherutse gukora indirimbo "A l’aise" ya Bruce Melodie na Innoss'B, yirebe.