Umutoza Pep Guardiola yashimagije Erik Ten Hag ku guhindura Manchester United, aho yemeza ko iyi kipe baturanye yenda kugaruka hejuru nk'uko yahoze.
Nyuma y'igihe kinini Manchester United itari mu bihe byiza, Guardiola yemeza ko iyi kipe iri mu nzira nziza zo kugaruka mu guhatanira ibikombe nk'uko byahoze.
Guardiola yagize ati:"Mfite ibyiyumvo ko Manchester United iri kugaruka, nyuma na nyuma iri kugaruka. Nabibonye bakina na Chelsea, igice cya mbere. Navuze ko nakunze ibyo mbona kuri United aka kanya."
Uyu munya-Esipanye kandi yemeza ko Manchester United ishobora kuba imwe mu makipe bagiye guhanganira ibikombe by'imbere mu gihugu.
Guardiola ati:"Hazaba hari amakipe nka United ahatana. Iyo niyo mpamvu ugomba kurwana ngo ubone itike ya Champions league ukanarwanira ibikombe."
Erik Ten Hag yashimwe ibyo ari gukora muri Manchester United(Image:The sun)
Muri Mata ubwo Erik Ten Hag yendaga kwemezwa nk'umutoza mushya, Guardiola yatangaje ko ari umutoza mwiza ufite n'ubushobozi bwo kumusimbura muri Manchester City dore ko bakoranye kuva 2013 kugeza mu 2015 ubwo yari umwungiriza we muri Bayern Munich.
Erik Ten Hag yatangiye gutoza Manchester United muri uyu mwaka w'imikino aho yari asimbuye Ralf Rangnick watoje iyi kipe amezi asaga atandatu, nawe wari wasimbuye Ole Gunnar Solskjaer wirukanwe.
Uyu muhorandi ntiyatangiye neza kuko yatsinzwe imikino ibiri ya mbere aho yatsinzwe na Brighton 2-1, ndetse agatsindwa na Brentford 4-0. Nyuma y'aha Ten Hag yabashije kugarura ikipe ye yitwara neza aho mu mikino ikenda ya shampiyona yatsinzwemo umukino umwe gusa.
Manchester United kandi ntiratsindwa mu mikino irindwi iheruka ubaze amarushanwa yose, haba muri Premier league na Europa league.
