Ni urutonde rwiganjeho rwiganjeho abaherwe bo muri Afurika y’Epfo na Nigeria, gusa nta n’umwe wabashije kuruzaho wo mu karere ka Afurika y’i Burasirazuba, icyakora muri 20 hagaragaramo umwe gusa.
10. Patrice Motsepe
Uyu muherwe ukomoka muri Afurika y’Epfo w’imyaka 63 y’amavuko, abarirwa ko atunze akayabo ka miliyari 3 z’amadorari.
Uyu mugabo uretse kuba yarabaye na Perezida w’Ishyirahamwe ry’Umupira w’amaguru muri Afurika, asanzwe ari n’umushoramari ukomeye.
Ubutunzi bw’uyu mugabo ahanini bwakomotse mu bucukuzi bw’amabuye y’agaciro, aho byatangiye kumuhira mu mwaka wa 2004 binyuze muri kompanyi ye yise ‘Rainbow Minerals’, aho kuri ubu afite n’izindi kompanyi esheshatu zikora ibintu bitandukanye.
9. Mohamed Monsour
Uyu na we ni umuherwe ukomoka mu Misiri, aho abarirwa ko atunze akayabo ka miliyari 3.4 z’amadorari akura muri business afite hirya no hino mu Misiri no mu bindi bihugu.
Uyu mugabo w’imyaka 77 y’amavuko, uretse kuba ari umushoramari, yigeze no kuba Minisitiri ushinzwe ubwikorezi bw’ibicuruzwa no gutwara abantu, kuva mu mwaka wa 2005 kugeza 2009.
8. Koos Bekker
Koos na we ni undi muherwe wo muri Afurika y’Epfo, aho abarirwa ko atunze akayabo ka miliyari 3.4 z’amadorari.
Uyu mugabo afite ikigo cy’itangazamakuru kitwa ‘Naspers’, kikaba gikorera mu bihugu 130 hirya no hino ku Isi harimo Amerika, Ubwongereza, Ubuhinde no mu Bushinwa.
7. Naguib Sawiris
Uyu mugabo nawe ukomoka mu Misiri, akaba ari umushoramari ukomeye ufite kompanyi zikomeye zirimo iyitwa ‘Weather Investments’s Parents Company’ n’izindi zitandukanye.
Naguib w’imyaka 70 y’amavuko akaba abarirwa ko atunze akayabo ka miliyari 5 z’amadorari.
6. Abdulsamad Rabiu
Rabiu ni umwe mu baherwe bo muri Nigeria, aho abarirwa ko atunze akayabo k’asaga miliyari 5.1 z’amadorari akura muri kompanyi afite hirya no hino zikora ibintu bitandukanye.
Uyu mugabo w’imyaka 64 y’amavuko, mu mwaka wa 2024 akaba ari we wari umuherwe wa kabiri muri Nigeria.
5. Mike Adenuga
Mike ni undi muherwe wo muri Nigeria ubarirwa ko atunze akayabo ka miliyari 6.8 z’amadorari.
Ubutunzi bw’uyu mugabo bukaba buva muri kompanyi zikomeye afite zirimo iyitwa ‘Globacom’, kompanyi ya kabiri muri Nigeria ikora ibijyanye n’itumanaho ndetse ikaba ikorera muri Ghana na Benin, ndetse akaba afite imigabane muri ‘Equitorial Trust Bank’.
4. Nassef Sawiris
Uyu ni umuherwe w’imyaka 64 y’amavuko ukomoka mu Misiri, aho abarirwa ko atunze akayabo ka miliyari 9.6 z’amadorari, akura muri business zitandukanye harimo na kompanyi ye ya ‘V Sports’ n’izindi.
3. Nicky Oppenheimer
Nicky ni umwe mu baherwe bo muri Afurika y’Epfo w’imyaka 79 y’amavuko, aho abarirwa ko atunze akayabo ka miliyari 10.4 akura mu bucukuzi bw’amabuye y’agaciro.
2. Johann Rupert
Johann w’imyaka 74 y’amavuko ni umuherwe wo muri Afurika y’Epfo ubarirwa ko atunze akayabo ka miliyari 14 z’amadorari.
Ubutunzi bwe ahanini bikaba bivugwa ko buva muri Kompanyi ye ifite icyicaro mu Busuwisi ariko ikorera no muri Afurika y’Epfo yitwa ‘Richmont’ icuruza ibijyanye n’imirimbo birimo amasaha, imikufi n’ibindi by’agaciro.
1. Aliko Dangote
Uyu mugabo w’imyaka 61 y’amavuko ukomoka muri Nigeria, kugeza ubu akaba ari we ufatwa nk’umuherwe wa mbere muri Nigeria ndetse no muri Afurika yose muri rusange, aho abarirwa ko atunze akayabo ka miliyari 23.9 z’amadorari.
