Raphael Varane yasohotse mu kibuga ku munota wa 60 arira mu mukino wahuzaga Manchester United na Chelsea, mu gihe Igikombe cy'isi kibura iminsi itageze ku kwezi ngo gitangire.
Uyu mufaransa wagize uruhare mu itwarwa ry'Igikombe cy'isi cyo mu 2018 cyabereye mu Burusiya, yagiye hasi ubwo yageragezaga kwambura umupira rutahizamu Aubameyang. Akiva mu kibuga yabanje kuvugana ho gato n'umutoza Erik Ten Hag, ahita yerekeza mu rwambariro.
Raphael Varane yasohotse mu kibuga arira (Net-photo)
Varane yakunze kugira ibibazo by'imvune mu mwaka w'imikino ushize, byatumye atagaragara cyane mu kibuga muri uwo mwaka wari uwa mbere muri iyi kipe. Gusa kuri ubu ni umwe mu nkingi za mwamba mu bwugarizi bwa Erik Ten Hag, n'ubwo yari yagize imvune idakanganye ku mukino wa Manchester City yatumye ava muri uyu mukino hakiri kare.
Si ubwa mbere Varane atera abafana ba Manchester United n'Ubufaransa ubwoba kubera imvune muri uyu mwaka w'imikino, kuko ubwo yakinaga iminota 40 gusa ku mukino batsinzwemo na Manchester City ibitego 6-3 nabwo impungenge zari zose.
Kugeza ubu ntabwo itsinda ry'abaganga ba Manchester United barasobanura neza ikibazo yagize n'igihe azamara adakina, ariko ubwoba ni bwose ko uyu musore yakwiyongera ku bandi bakinnyi bari kugenda bava mu bazakoreshwa mu gikombe cy'isi kubera imvune.
Ubufaransa bwugarijwe n'imvune cyane dore kl ubu N'Golo Kante yavunitse ndetse na Paul Pogba bakinana akaba aribwo ari hukiruka imvune bivuze ko bitizewe niba muri Qatar azaba ameze neza. Si abo gusa kandi kuko na myugariro Wesley Fofana washoboraga kuzatekerezwaho nawe yavunitse.
Igikombe cy'isi cya 2022 kizabera muri Qatar kizatangira tariki 19 Ugushyingo 2022 kirangire tariki 18 Ukuboza 2022, bivuze ko iminsi isigaye itanageze ku kwezi.
Impungenge ni zose ku bafaransa(Net-photo)
