Ubu amakuru ahari aravuga ko Chelsea yabuze uko inywesha esanse kuri sitasiyo kuko konti zayo muri banki ya Barclays zahagaritswe ubu bidashoboka ko mafaranga ariho yakoreshwa.
Ibi bibaye nyuma y'uko ku wa kane umuherwe wa Chelsea Roman Abramovich yasohotse ku rutonde rw'abafatiwe ibihano na leta y'Ubwongereza imitungo yabo igafatirwa, kubera umubano wabo na perezida w'Uburisiya Vladimir Putin.
Nyuma y'ibi umuterankunga wa Three(3) usanzwe agaragara ku mipira ya Chelsea ndetse akaba atanga miliyoni 40 z'amapawundi ku mwaka, yahise ahagarika amasezerano, ndetse na konti za Chelsea ziri muri Barclays ziba zihagaritswe.
Ubu ikinyamakuru The Atletic kiravuga ko ibi biratuma Credit cards za Chelsea zitongera gukora, bigatuma batagira icyo bagura harimo no kunywesha esanse ku masitasiyo, ngo bifashishe imodoka y'ikipe mu ngendo.
Ibi byazamuye ibibazo mu bakurikirana ruhago yo mu Bwongereza kuko hibazwa ukuntu Chelsea izajya ikina imikino yo ku bindi bibuga, harimo n'umukino iyi kipe ifitanye na Lille yo mu Bufaransa muri champions league, ku wa gatatu.
Ibyangombwa Chelsea yahawe biyemerera gukoresha amapawundi ibihumbi 20 gusa mu rugendo. Gusa abahagarariye Chelsea bizeye ko vuba aha banki ya Barclays ishobora gufungura izi konti, ndetse bari kuvugana na leta y'Ubwongereza ngo hagirwe ibihindurwa mu byo Chelsea yemerewe muri iyi minsi.
Hari hatangiye kuzamuka ubwoba ko Chelsea ishobora no kudasoza umwaka w'imikino mu gihe ibyo yemerewe bitaba bivuguruwe, ngo wenda yemererwe kugurisha amatike. Ariko ku rundi ruhande Roman Abramovich ari gukora uko ashoboye ngo iyi kipe igurishwe maze ibi biveho ikomeze ubuzima n'ubwo yaba atayifite.
Ibiganiro byo birakomeje ngo harebwe uko iyi kipe yagurishwa, ariko leta y'Ubwongereza niyo izagenzura ibi byose ndetse ikanagena icyo amafaranga avuyemo azakoreshwa.
Ikibazo cy'ingendo cyiri mu bihangayikishije muri Chelsea(Net-photo)
Abramovich ari gukora ibishoboka ngo ikipe igurishwe(Image:Reuters)
