Muri iri rushanwa, Afurika yari ihagarariwe n'amakipe 10, harimo na Marrocco yagerageje guhanyanyaza ikagera kure kurusha izindi, nubwo itabashije kugera muri 1/2 nyuma yo gusezererwa n'u Bufaransa muri 1/4.
Nyuma ya Marrocco, hari Misiri nayo yageze muri 1/8 k'irangiza, nyuma yo gusezererwa na Argentine ku ntsinzwi y'ibitego 3-2.
Andi makipe arindwi yo kuri uyu mugabane, arimo Repubulika Iharanira Demokarasi ya Congo, Sénégal, Ghana, Afurika y'Epfo, Cape-Verde, Algéria na Côte d'Ivoire, yose yabashije kurenga amatsinda ariko asezererwa muri 1/16 k'irangiza.
Mu gihe ayo makipe yagaragaje guhatana, Tunisia ni yo yonyine itarabashije kurenga amatsinda, kuko yo yakubitiwe ahareba inzega, maze istindwa imikino yayo yose uko ari itatu.
Uretse kwitwara neza mu kibuga, amakipe ya Afurika yanatahanye akayabo k’amafaranga menshi yahembwe na FIFA hashingiwe ku ntera buri kipe yagezeho.
Morocco, yageze muri 1/4 cy'irangiza, yahembwe miliyoni 19 z'Amadolari ya Amerika, mu gihe Misiri yo yahembwe miliyoni 15 z'Amadolari nyuma yo kugera muri 1/8 cy'irangiza.
Amakipe arimo RDC, Sénégal, Ghana, Afurika y'Epfo, Cape-Verde, Algéria na Côte d'Ivoire, yasezerewe muri 1/16 k'irangiza, buri imwe yahembwe miliyoni 11 z'Amadolari.
Ku rundi ruhande, Tunisia yasezerewe ikiri mu matsinda, yo yahawe miliyoni 9 z'Amadolari, ndetse buri kipe yose yari yarahawe andi miliyoni 1.5 z'Amadolari yo kuyifasha mu myiteguro mbere y'uko irushanwa ritangira.
Umwanditsi: NIYOMUKIZA Gratien
