Umutoza Pep Guardiola utoza Manchester City yemeje ko iyi kipe ye igiye gukina na mukeba wayo Manchester United idafite myugariro ngenderwaho Ruben Dias kubera ikibazo cy'imvune.
Uyu ni umukino uhuza abakeba bo mu mujyi umwe wa Manchester, ukaba uteganyijwe ku cyumweru saa 18:30 ku kibuga cya Manchester City aricyo Etihad Stadium.
Ikipe ya Guardiola ntishaka gutakaza amanota kuko irusha Liverpool amanota atandatu gusa, kandi Liverpool igifite umukino itarakina.
Ruben Dias ni umwe mu bakinnyi bake ba Manchester City batajya bapfa kubura mu kibuga kuko yakinnye imikino 25 mu mikino 27 ikipe ye iheruka gukina muri Premier league. Dias kandi yitwaye neza kuva yagera muri iyi kipe, dore ko yanabaye umukinnyi w'umwaka watowe n'abanyamakuru bandika.
Byitezwe ko Ruben Dias azamara hagati y'ibyumweru bine na bitandatu adakina, kubera ikibazo afite cy'imikaya, ibyo bita hamstring mu cyongereza. Ndetse Manchester City izakina idafite myugariro wayo Nathan Ake wagize akabazo mu mukino wa FA iyi kipe iherutse gutsindamo Peterborough ku wa kabiri.
Kuri uyu wa gatanu mu kiganiro n'itangazamakuru, Pep Guardiola yagize ati:"Nathan na Ruben ntabwo biteguye!"
Abajijwe igihe Ruben Dias azamara, Pep Guardiola ati:"Imvune y'imikaya! Ibyumweru bine kugera kuri bitandatu. Bibaho. Mu yindi myaka y'imikino abakinnyi bacu bagiye bamara amezi badakina.
"Nakishimiye ko yaba ahari, ariko ntahari. Ntabwo narira. Ni uko bimeze. Dufite abakinnyi bakwiye bahari. Dufite abakinnyi 14-15.
"Hamwe n'aba bakinnyi tugiye kurwana Kandi tugerageze gukina neza. Ntibishoboka ko warwana udakina neza. Dukinana n'abantu bacu kandi twizera ko abantu bacu badushyigikira kandi babikora buri gihe"
Ikipe ya Manchester City iraza muri uyu mukino igerageza kugumana umwanya wa mbere mu buryo buhamye, mu gihe Manchester United nayo ikomeje inkundura yo gushaka umwanya wa kane dore ko itarizera ko izasoza mu makipe ane ya mbere mu Bwongereza.
Manchester United yicaye ku mwanya wa kane ku rutonde rw'agateganyo rwa shampiyona aho irusha Arsenal na Tottenham amanota abiri, ariko Arsenal ikaba ifite imikino itatu y'ibirarane, mu gihe Tottenham ifite imikino ibiri y'ibirarane.
Manchester City izakina idafite ba myugariro Nathaniel Ake na Ruben Dias bavunitse(Image:Sports mole)
