Kuri uyu wa gatandatu nibwo hari hateganyijwe umukino w'ishiraniro hagati y'amakipe abiri apingana mu Rwanda, ariyo Rayon Sports na APR FC.
Ni umukino watangiye saa 15:30 ukaba uyobowe n'umusifuzi Ishimwe Claude kuri stade ya Kigali i Nyamirambo, ku munsi wa 19 wa shampiyona.
Abakinnyi APR FC yabanjemo ni:Ishimwe jean Pierre,Ombolenga Fitina, Niyomugabo Claude, Nsabimana Aimable, Buregeya Prince, Mugisha Bonheur, Ruboneka jean Bosco, Manishimwe Djabel, Byiringiro Lague, Mugisha Gilbert na Tuyisenge Jacques.
Abakinnyi Rayon Sports yabanjemo ni: Hakizimana Adolphe, Nizigiyimana Mackenzie, Iranzi jean Claude, Niyigena Clement, Ndizeye Samuel, Kwizera Pierrot, Niahimwe Blaise, Muhire Kevin, Manace Mutatu, Mael Dindjeke na Musa Esenu.
Umutoza Adil Errade Mohamed ntaratsindwa na Rayon Sports kuva yagera mu Rwanda, ni mu gihe umutoza Jorge Manuel da Silva Paixao we aribwo akigera mu Rwanda bivuze ko ari umukino wa mbere akinnye na APR FC, nyuma y'uko avuze ko uwo mukino nta derby abonamo.
Rayon Sports yatangiye ikoresha cyane uruhande rw'iburyo rwariho Nizigiyimana Karim Mackenzie na Manace Mutatu bagoye cyane ikipe ya APR FC ariko nabo igitego ntibabasha ku kibona.
APR FC nayo yagaragaye ikoresha cyane uruhande rwayo rw'iburyo rwariho Ombolenga Fitina ndetse nawe akazamuka akagera mu izamu, ariko birangira igitego kibuze.
Abakinnyi bari bitezweho ibitangaza nka Lague, Esenu, Jacques nyabwo baragaragara neza muri uyu mukino ngo batange umusaruro cyangwa barate ibitego bigaragara.
N'ubwo abatoza bagerageje gukora impinduka mu gice cya kabiri ndetse APR FC ikataka cyane, amakipe yasoje iminota 90 anganya ubusa ku busa.
Bivuze ko Rayon Sports ihita igira amanota 43 igakomeza kurushwa amanota umunani na APR FC. APR FC irarusha Kiyovu Sports amanota atatu, bivuze ko Kiyovu nitsinda Gicumbi FC ihita inganya na APR FC.
Rayon Sports yanganyije na APR FC ubusa ku busa
