Hagati ya APR FC na RS Berkane rwabuze gica

Hagati ya APR FC na RS Berkane rwabuze gica

 Nov 28, 2021 - 16:55

Ikipe ya APR FC yanganyije na RS Berkane yo muri Maroc mu mikino ya confederation cup.

Ni umukino w'ijonjora rya nyuma mu mikino ya CAF confederation cup mbere y'uko amakipe agera mu matsinda y'iri rushanwa mu mwaka wa 2021-2022.

Ikipe ya APR FC yagombaga kwakira RS Berkane yo muri Maroc kuri stade ya Kigali i Nyamirambo ku isaha ya saa 15:00 nk'uko byari biteganyijwe.

APR FC ihagarariye u Rwanda muri CAF confederation cup(Net-photo)

Abakinnyi 11 bari babanjemo ku ruhande rw'ikipe ya APR FC ni Ishimwe Pierre,Ombolenga Fitina,Ndayishimiye Dieudonne,Nsabimana Aimable,Buregeya Prince,Ruboneka j Bosco,Rwabuhihi Placide,Mugisha Gilbert,Manishimwe Djabel,Kwitonda Alain na Bizimana Yannick.

Naho ku ruhande rwa RS Berkane yo muri Maroc abakinnyi babanjemo ni Elouaad,Elmoussaoui,Bentarcha,Regragui,Baadi,Naji,Elhilali,Elmoudane,Alfahli,Twisila na Elbahraoui.

  RS Berkane yo muri Maroc(Net-photo)

Umukino watangiye amakipe yombi yigana ukabona ko nta kipe ifite gahunda yo gutsinda kare n'ubwo zanyuzagamo zikatakana.

Ku munota wa 36' wonyine nibwo habayeho impinduka ku ruhande rwa APR FC uwitwa Kwitonda Alain ava mu kibuga hajyamo Byiringiro Lague.

Ikipe ya APR FC yakomeje gushaka igitego ariko biranga igice cya mbere kirangira ari ubusa ku busa nta kipe ibonye igitego.

Igice cya kabiri ikipe ya APR FC yakomeje kotsa igitutu ari nako bakora impinduka dore ko ku munota wa 60' Mugisha Gilbert na Bizimana Yannick bavuyemo hakinjira Mugunga Yves na Ishimwe Anicet bakomeza kwataka.

Ku munota wa 67' Ruboneka jean Bosco yagerageje gutungura umuzamu wa RS Berkane ariko umupira awutera inyuma ku izamu.

Rwabuhihi Placide yaje guha umwanya Nsanzimfura Keddy ku munota wa 80 ari nako bigaragata ko RS Berkane ikiyiraje ishinga ari kurinda izamu ryayo.

Ku munota wa 81 myugariro wa RS Berkane witwa Regragui yeretswe ikarita itukura nyuma yo guahyira hasi Mugunga Yves wari umaze kumucika agahabwa ikarita y'umuhondo ya kabiri.

Nsanzimfura Keddy wari umaze kwinjira mu kibuga yatunguye umuzamu ku munota wa 86' ariko umuzamu awukuramo.

Umukino wo kwishyura hagati y'aya makipe uzaba tariki 5,Ukuboza 2021 aho uzabera muri Maroc ari RS Berkane yakiriye hagahita hamenyekana ikipe ijya mu matsinda.