Umunsi ubaye uwa Gatatu ibintu bihinduye isura ku mirongo y'urugamba hagati y'Ingabo za Ukraine n'iz'u Burusiya, kuko ubu noneho imirwano iri kubera mu Ntara ya Kursk iri kumupaka ubahuza.
Ku wa Kabiri w'iki Cyumweru, nibwo ingabo za Ukraine zigera 1000 n'imodoka by'intambara zinjiye mu ntara ya Kursk batangira guhangana n'ingabo z'u Burusiya kugera magingo aya.
Ibinyamakuru birimo BBC biratangaza ko Ingabo za Ukraine zimaze gusunika iz'u Burusiya ku ntera ya kilometero 10, ndetse ingabo z'impande zombi zikomeje gusakirana ku buryo bukomeye.
Ku ruhande rwa Ukraine, ntacyo baratangaza kuri iki gitero, gusa Perezida Volodymyr Zelenskyy avuga ko intambara nta mabwiriza igira, bityo ko bemerawe gukora ibitero aho bashaka.
Guverinoma z'Ibihugu byombi zasabye abaturage begereye muri ibyo bice kwimuka bwangu, kugira ngo batavaho bagwa mu mirwano, nko ku ruhande rw'u Burusiya, abasaga 3000 bamaze kuvanwa muri Kursk.
Ibi bitero bibaye mu gihe Ukraine yaherukaga kwikomanga ku gatuza ko yakiriye indege za f-16 z'Abanyamerika, bityo ko bagiye guhangana n'u Burusiya induru zikavuga.
Nubwo ikibuga bisa nkaho cyacuramiye ku Burusiya, ariko kandi no muri Ukraine imirwano ntikuraho cyane mu bice bya Donesky na Kharkiv.
