Umwaka urenga urashize intambara ihanganishije u Burusiya na Ukraine ishyigikiwe n'u Burengerazuba bw'isi irwanwa muri Ukraine.
Magingo aya nyuma y'uko u Burusiya bwigaruriye umugi wa Bakhmut wabaye isibaniro ry'urugamba mu mezi arenga 10 yose, impande zose ziri kwitegura ibitero kuyindi migi nubwo n'ubundi ibitero bikomeje mu bice binyuranye bya Ukraine.
Mu mpera z'icyumweru mu gace ka Dnipro abantu 22 barakomeretse mu gihe abandi 2 bahasize ubuzima mu bisasu byatewe kuri uwo mugi.
Ari nako Oleksandr Syrskyi komanda w'ingabo muri Ukraine yatangaje ko ingabo zabo mu gace ka Donesk na Luhansk babashije gutera imbambwe bigira imbere mu mugi wa Svatove.
Ukraine n'u Burusiya urugamba rukomeje gukara
Mu gihe Ukraine itangaza ko yigiyeho imbere metero zigera kuri 400 muri Donesk na Luhansk, mu gace ka Belgorod ko mu Burusiya kari ku mupaka na Ukraine gakomeje kuraswaho n'ingabo za Ukraine zikoresheje dorone.
Ikindi kandi Jens Stoltenberg Umunyamabanga mukuru wa OTAN, mu mpera z'icyumweru akaba yarahuye na Perezida wa Turukiya Recep Tayyip Erdogan kugira ngo bareba uburyo yakemera ko Sweden yakwinjira mu muryango abereye umuyobozi.
Guhera Ukraine yagabwaho ibitero n'u Burusiya, ibihugu bya Sweden na Finland byasabye ko byakwinjira muri OTAN bwangu, icyakora Turukiya nka kimwe mu bihugu biri muri uyu muryango, byanze ko ibi bihugu byinjiramo.
Turukiya ishinja Sweden na Finland gucumbikira abantu bakora ibikorwa by'iterabwoba mu gihugu cyabo. Icyakora Finland yo yarangije kwemererwa hakaba hasigaye Sweden.
Ubwo Jens Stoltenberg yahuraga na Erdogan, Stoltenberg akaba yatangaje ko ku wa 12 Kamena Sweden na Turukiya bazicara bagacoca ibibazo byabo, yewe na Finland izaba ihari kugira ngo basuzume ko Sweden yakwinjiramo
