Ikarita itukura yabyaye urukundo rw'umukinnyi n'umusifuzi

Ikarita itukura yabyaye urukundo rw'umukinnyi n'umusifuzi

 Jan 11, 2022 - 10:26

Umusifuzi w'umuhorandi witwa Shona Shukrula yatangaje ko ari mu rukundo na Jeff Hardeveld bahuye amaze kwerekwa ikarita itukura.

Shona Shukrula ni umusifuzi usifura imikino ya shampiyona y'ikiciro cya kabiri mu Buhorandi akaba ari naho Jeff Hardeveld akinira ikipe ya FC Emmen.

Tariki 13 mu kwezi kwa munani kwa 2021, uyu musifuzi w'imyaka 30 yari umusifuzi wa kane ku mukino wari ukomeye wahuje FC Emmen na FC Eindhoven.

Muri uyu mukino ikipe ya FC Emmen ikinirwa na Jeff Hardeveld yatsinzwe igitego kimwe ku busa, ariko muri uyu mukino Hardeveld yeretswe ikarita y'umutuku asohoka mu kibuga gusa bivugwa ko atigeze areba umusifuzi Shona Shukrula.

Ikinyamakuru cyo mu Buhorandi kitwa Telegraaf gitangaza ko aha ariho hantu ha mbere aba bombi baba barahuriye aho Shukrula yabonye umwanya wo kwitegereza Hardeveld.

Ubu aba banyamupira bombi bamaze kwemeza ko bari mu rukundo dore ko ubu bari mu biruhuko by'umwaka mushya mu mujyi wa Roma mu Butariyani.

Shona Shukrula yagiye kuri Instagram ye ashyiraho ifoto yabo bombi bishimanye ndetse ashyiraho amagambo agira ati:"Ubu biri ku mugaragaro Jeff Heldeverd!"

Jeff Heldeverd nawe yagiye ku rubuga rwe rwa Instagram ashyiraho iyo foto yabo bombi maze yandikaho ati:"2022" ndetse ashyiraho emoji z'umutima zigaragaza urukundo.

Shona Shukrula yatangiye gusifura imikino ya KNVB(Igikombe cy'igihugu mu Bujorandi) mu mwaka w'imikino wa 2009/2010 ndetse mu 2017 yagizwe umusifuzi mpuzamahanga wo ku rwego rwa FIFA.

Mu 2020 nibwo yatangiye gukora nk'umusifuzi wa kane mu mikino ya shampiyona y'ikiciro cya kabiri mu Buhorandi ari naho yahuriye na Jeff Heldeverd.

Shukrula na Hardeveld bemeje ko bari mu rukundo(Image:The sun)

Shukrula na Hardeveld bari mu minsi iryoshye(Net-photo)