Ibya Zinedine Zidane muri Manchester United bikomeje gufata indi ntera

Ibya Zinedine Zidane muri Manchester United bikomeje gufata indi ntera

 Nov 14, 2021 - 11:03

Ku gitutu gikomeye cy'abafana bayo, Manchester United iri gukora uko ishoboye ngo Zidane yemere kuyibera umutoza.

Manchester United ni ikipe imaze igihe kinini abafana bayo bavuga ko batishimiye umutoza uyitoza witwa Ole Gunnar Solskjaer.

Hagiye havugwa abatoza benshi bashobora kumusimbura ariko ubu haravugwa uwo benshi bifuza ariwe Zinedine Zidane.

Biravugwa ko noneho Manchester United yaba yashyizemo imbaraga zose ngo ireshye Zinedine Zidane abe yasimbura Ole Gunnar Solskjaer i Old Trafford.

Zidane ubu nta kipe ari gutoza(Image:CGTN)

Sunday Times iravuga ko noneho abayobozi ba Manchester United baba bavuye ku izima bakemera ko Ole Gunnar Solskjaer yakwirukanwa igihe Zidane yaba yemeye kumusimbura.

Zinedine Zidane w'imyaka 49 ubu nta kazi afite nyuma yo gutandukana na Real Madrid ku nshuro ya kabiri mu mwaka ushize.

Mu gihe yabaye muri Real Madrid yayifashije gutwara Champions League eshatu na shampiyona ebyiri za La Liga.

Zidane kandi akomeza no kuvugwa ko ashobora kuba ariwe wasimbura Mauricio Pochettino igihe yaba yirukanwe muri PSG dore ko ikipe ye itameze neza nk'uko benshi bari bayiteze.

Manchester United ifite ikizere ko unubano zidane yagiranye na Cristiano Ronaldo kimwe na Rafael Varane bishobora gutuma yemera kuyitoza. Abo bombi yabatoje muri Real Madrid ndetse bajya muri United mu mpeshyi ishize.

  Zidane,Ronaldo na Varane muri Real Madrid (Image:Sky sports)

Gutwara ibikombe no guteza imbere impano z'abakiri bato nibyo bituma Zidane aba umutoza wifuzwa n'amakipe anyuranye.

Ole Gunnar Solskjaer yinjiye muri Manchester United muri 2018 nk'umutoza w'agateganyo birangira ahagumye.Ubu amaze imyaka itatu nta gikombe aratwara.

Kuva Manchester United yatsindwa na Liverpool ibitego bitanu ku busa na Manchester City ikayitsindira mu rugo ibitego bibiri, abafana bakomeje gushyira igitutu ku buyobozi.

Ole Gunnar Solskjaer utoza Manchester United(Image:CNN)

Bivugwa ko ubuyobozi bwari bwasohoye abatoza bane bashobora kuvamo uwasimbura Ole Gunnar Solskjaer aribo Zinedine Zidane, Antonio Conte, Brendan Rodgers na Erik Ten Hag utoza Ajax.

Conte we byarangiye agiye muri Tottenham Hotspurs nyuma yo kwirukana Nuno Espirito Santo ubwo hasigaye batatu gusa nabo babiri bafite amakipe usibye Zidane.