Ibaruwa yuzuye ikiniga yandikiwe Bruce Melodie

Ibaruwa yuzuye ikiniga yandikiwe Bruce Melodie

 Oct 15, 2022 - 12:10

Nshuti muvandimwe nkunda mbanje kugusuhuza ngushimira ubwitange, umurava n’urukundo wereka abakunda ibihangano byawe kuva ugitangira kugeza ubu,ugire Amahoro ,impagarike n’ubugingo!

Iyi baruwa iragira iti:"

Nkwandikiye iyi baruwa nk’umufana wawe ufite impungenge. Nyanditse mu mwanya w’abafana bawe bitwa Ibitangaza.

Muvandimwe uri icyatwa kandi uri umugabo udasubira inyuma. Abafana tugukomera amashyi. Ntuzatitizwe n’ibyo wumva kuko ibyo umaze kubona ni bicye kuko umwanzi ntacogora kukugenda runono. Shikama uhangane n’abatakwifururiza ineza kuko baba bari gutera imigeri nk’abasezera iby’isi. Dore igicu kirabuditse kandi intsinzi urayikozaho imitwe y’intoki.

 

Nshuti muvandimwe, urebye imyaka 10 ishize ushinze imizi mu muziki yaranzwe n’ibihe bibi n’ibyiza ariko wahahagaze bwuma. Byari byiza ugifata umwanya ukandika indirimbo ziryoheye amatwi kandi zifite injyana zihariye.

Ubu rero nawe usigaye wirukankana n’ibiguruka ukaduha (twe abafana bawe) ibihangano wiboneye kuberako urajwe ishinga no gukirigita ifaranga ariko ugashaka kwifungira andi mayira ari nayo wakabaye utekereza mbere y’ibindi byose. Nibyo uherutse gukora indirimbo itaravuzweho rumwe nawe waryumyeho wirinze kugira icyo uyivugaho. Ariko rero buriya ushobora gukora indirimbo nawe ikagutera ishema ntigutere ipfunwe kandi ikagucururiza. Wicuranwa dore ibiryo ni byinshi kandi abaryi ni mbarwa.

Ntabwo nkatwe abafana bawe bidushimisha iyo tubona twaragendanye imyaka 10 none ukaba utategura igitaramo cyawe wenyine (a one man show/concert) niba koko wabishobora uzabigerageze tuzakuba hafi ni nabwo uzabona ikigero cy’abo mwabanye mu myaka 10 yose hanyuma bizaguha ishusho y’icyo gukora mu myaka 10 iri imbere.

 

Nshuti mukunzi wahoze ufasha abahanzi babiri kandi byari byiza none warabacukije kandi nibwo bari bakeneye kuba mu mababa yawe . Waguruka ukabagurukana none usigaye uguruka wenyine. Nyamara ufashe izindi mpano ukazinjiza mu muziki neza zaba mu gicucu cyawe n’igihe bitameze neza bo bakaba bahagaze mu ruhande rwawe. Erega nibwo witwa umuhanzi w’ibigwi iyo hari abakurata imyato ko iyo batakugira batari kuba abo bari ubu.

Bruce Melodie rero dore igihe kirageze ngo ugarure ya nzu itunganya ibihangano by’abahanzi yahoze yitwa Igitangaza. Nibyo gukorera mu nzu zitandukanye z’imiziki ariko buriya ubwamamare ufite bukwemerera kugira studio yawe ikora neza kandi ikaba yatanga umusanzu mu iterambere rya muzika nyarwanda ari nako ikwinjiriza agatubutse.

Ndetse iyi studio yagufasha kuzamura impano za ba bahanzi bashya waba wemeye guhisha mu mababa yawe.

 

Bruce Melodie ukwiriye kugira igitangazamakuru cyo gutangaza amakuru yawe mbere y’ibindi bitangazamakuru. Twarishimye twumviseko watangije Isibo Tv, tuza gusanga byari ukuyimenyekanisha ariko buriya byakweretseko izina ryawe ryakora igitangazamakuru kikamamara. Iki gitangazamakuru kizagufasha mu gusakaza ibikorwa byawe (Music promotion), kumurikira rubanda ubucuruzi bwawe, kumurikira rubanda za mpano nshya uzaba wiyemeje kuzana mu muziki.

Ni nabwo uzagira abanyamakuru baririmba ibikorwa byawe n'izina ryawe aho bari hose ku buryo bazahora barema inkuru zikugarukaho mu bitangazamakuru hirya no hino. Erega uko uvugwa niko urushaho gucuruza no guhenda abakeneye ko mugirana imikoranire. Mu muziki iyo uvugwa urushaho gucuruza kuko ni wowe uba watambutsa ibyo abagukeneye bifuza kugeza ku bakiriya babo.

 

Nshuti mukunzi wahoze ukorana n’abahanzi bakora Hip Hop bikadushimisha none waramamaye bamwe ubicaho kandi buriya inshuti zo mu bwana zikuritira izo mwahujwe n’inda. Erega hari abagize uruhare mu kukumenyekanisha cya gihe waririmbaga mu nyikirizo z’indirimbo zabo kandi byaragufashije birigaragaza. Subiza amaso inyuma ukorane na ba bahanzi bakora Hip Hop kuko bafite abafana babahoza ku mutima kandi nawe byaguteraga guhora uhagaze neza mu bafana b’impande zose none biragoye kumenya abafana bawe abo ari bo.

 

Nshuti mukundwa reba impano nshya ziri kuza uzishyigikire mu bikorwa bya muzika. Hari abahanzi bakiri gushaka aho bamera kandi ubafashe akaboka wabageza ku nzozi zabo bakazahora bagufata nk’urumuri mu rugendo rwabo rwa muzika. Nubona umuhanzi ugakunda impano ye ujye umufata akaboka mukorane indirimbo imufungurire inzira zari zifunze. Nyamuneka nibakwegera ntukabahinde dore n’izibika zari amagi.

 

Reka nsubikire aha ariko sinasoza iyi baruwa ntagushimiye uko ukomeje gukora ubudahagara ariko subiza amaso inyuma urebe za nshuti zashyize itafari ku muziki wawe urebe abo mushobora gukomezanya kuko abo muri kumwe ntabwo bashobora kukubwira ibitagenda kuberako mwese mwahujwe no gushaka imibereho rero bamwe muri bo ntibitaye ku iterambere ryawe barakuryarya ntubimenye. Mu bakuri hafi ongeramo abashobora kumenya ikibura n’aho kongera imbaraga mu mwuga wawe kuko usa nk’aho udafite abantu bakwicaza bakakubwira n’akari I Murori.

 

Yari umukunzi wawe wishimira iterambere ryawe nkaba nifuza ko igihe kimwe wajya utegura, iserukiramuco, ibitaramo mu nzu nini, ibibuga binini hakuzura abafana baje kugutera ingabo mu bitugu kuko Imana iri kumwe nawe muri byose.

 

Ugire amahoro!"

Iyi baruwa yanditswe n'umufana wa Bruce Melodie

Reba hano indirimbo iheruka ya Bruce Melodie