Ikipe ya FC Barcelona imaze igihe kitari gito iri mu biganiro n'umufaransa Ousmane Dembele ngo bamwongerere amasezerano ariko ubu biravugwa ko ibintu byaba biri mu nzira zo kwanga.
Ousmane Dembele w'imyaka 24 afite amasezerano muri FC Barcelona azarangira mu mpeshyi ya 2022 ndetse mu minsi ishize byari byavuzwe ko yemeye kuyongera. Gusa kuri iyi nshuro bisa n'aho biri kwanga kuko hari amakuru avuga ko uyu musore yaba agiye kwerekeza muri Juventus.
Umutoza mushya wa FC Barcelona Xavi yifuza cyane kugumana uyu musore akamufasha kugarura iyi kipe ku murongo dore ko itari mu bihe byiza muri iyi minsi ndetse ikaba iri kurwana no kuza mu makipe ane ya mbere muri La liga.
Ousmane Dembele yageze muri FC Barcelona mu 2017 avuye muri Borussia Dortmund aho yaguzwe miriyoni 135 z'amapawundi. Mu cyumweru gishize nibwo hasohotse amakuru avuga ko yaba yemeye no kugabanya unushahara agahembwa ibihumbi 200 by'amapawundi ku cyumweru.
Ibi Ousmane Dembele yari yabyemeye kuko azi ko FC Barcelona nta mafaranga ifite ariko yamenye amakuru ko iyi kipe ishaka kuzana Erling Haaland mu mpeshyi itaha nk'uko bivugwa n'ikinyamakuru Sport.
Umu-agent wa Erling Haaland witwa Mino Raiola aherutse kuvuga fC Barcelona nk'imwe mu makipe ane uyu musore yakwerekezamo mu mpeshyi itaha ubwo yaba avuye muri Borussia Dortmund.
Amasezerano ya Erling Haaland muri Borussia Dortmund avuga ko mu mpeshyi ya 2022 uwamushaka yazana miriyoni 64 z'amapawundi, ariko ikinyamakuru Marca kuri uyu wa Gatatu cyatangaje ko ikipe izasinyisha Haaland amasezerano y'imyaka 5 bizayitwara miriyoni 400 z'amapawundi hashyizwemo amafaranga yahembwa, ayahabwa umu-agent we ndetse na Papa we.
Ikipe ya FC Barcelona ni ikipe yagonzwe n'ikibazo cy'ubukungu kuko iyi kipe ifite amadeni arenga miriyari y'amapawundi igomba kwishyura, ikaba yarahuye n'iki kibazo nyuma yo kugura nabi abakinnyi bagiye bayihombera.
Abakinnyi bakomeye nka Gerard Pique, Sergio Busquets ndetse na Jordi Alba byabaye ngombwa ko bagabanya imishahara kugira ngo bafashe iyi kipe gukomeza kubaho muri ibi bibazo dore ko ari nabyo byatumye Lionel Messi ayivamo ku bw'ibyo bibazo by'amafaranga.
Gusa n'ubwo bimeze gutya ikipe ya FC Barcelona n'umutoza wayo Xavi baracyafite ikizere ko bakumvikana n'uyu mufaransa dore ko ubu mu kwa mbere araba yemerewe kuvugana n'ikipe ashaka akayerekezamo mu kwezi kwa 6 kwa 2022.
FC Barcelona kandi igomba kugabanya amafaranga ihemba ndetse ikarekura n'abandi bakinnyi kugira ngo babashe kwandikisha Ferran Torres baherutse kugura mu ikipe ya Manchester City.
FC Barcelona iravugwa mu makipe yifuza Haaland(Image:SportsMax)
Ousmane Dembele akomeje ibiganiro na FC Barcelona(Image:Football Espana)
