Erling Haaland, Jeremy Doku ndetse na Kevin De Bruyne bareberaga bagenzi babo mu bafana, ubwo ikipe ya Manchester City yatsindaga Urawa Reds ibitego 3-0, muri kimwe cya kabiri cy'Igikombe cy'isi cy'ama-club.
Amabwiriza ya FIFA agena ko umukinnyi utari uri mu bakinnyi bashoboraga kwifashishwa mu mukino wa kimwe cya kabiri(matchday squad), adashobora no kuba yakwifashishwa mu mukino wa nyuma w'iyi mikino.
Ku wa Gatanu tariki 22 Ukuboza 2023, nibwo biteganyijwe ko Manchester City izatana mu mitwe na Fluminense yo muri Brazil, ukaba ari umukino wa nyuma uzabera kuri King Abdullah Sports iherereye Jeddah muri Saudi Arabia.
N'ubwo aba bakinnyi batatu batakoreshejwe kuri uyu mukino kubera ibibazo by'imvune bamaranye iminsi, ibi bivuze ko n'iyo ku wa Gatanu baba bameze neza ntawemerewe gukina uwo mukino.
Erling w'imyaka 23 ntiyagaragaye mu mikino itatu iheruka ya Manchester City, bitewe n'imvune y'ikirenge yagiriye ku mukino batsinzwemo na Aston Villa.
Ni mu gihe Kevin De Bruyne we ari imyitozo ya mbere yari agaragayemo kuva muri Kanama, akaba atari mu bakinnyi Pep Guardiola yajyanye yitezeho kumufasha.
Jeremy Doku we byitezwe ko araza kuba ameze neza mu minsi mike, kuva atemerewe gukina uyu mukino, byitezwe ko azagaruka ku mukino uzahuza Manchester City na Everton tariki 27 Ukuboza 2023.
Haaland, Doku na De Bruyne ntibazakoreshwa ku mukino wa nyuma
