Arteta, wahoze ari umwungiriza wa Guardiola muri Manchester City, yemeye ko nubwo uyu mutoza wahoze ari umwigisha we akunze kumubera inzitizi mu guhatanira ibikombe bya Premier League, bitamubuza gukomeza kumwubaha no kumwiyumvamo.
Ati “Byaba ari urugero rubi kuri siporo turamutse tubuze kubana neza. Umubano wa Nadal na Federer watwigishije ko ushobora guhatana bikomeye ariko ukagumana icyubahiro.”
Nubwo Arsenal itaratwara igikombe gikomeye kuva yatwara FA Cup mu 2020, Arteta yibukije ko guhatana na City atari intambara y’urwango, ahubwo ari ugushaka intsinzi mu kibuga gusa.
Yongeyeho ko Manchester City izahora igura abakinnyi bashya ishaka gutsinda, kandi ko bitatungurana kuko ari umuco wayo wo gutsinda.
Ibi byatangajwe mu gihe Arsenal iyoboye shampiyona n’amanota ane irusha Manchester City, ibintu byongera ubukana bw’iri hangana rikomeye riri gufatwa nk’irya Nadal na Federer mu mupira w’amaguru w’u Bwongereza.
Arteta wahoze ari umwungiriza wa Guardiola muri Manchester City, yemeye ko nubu akimwubaha.
Umwanditsi: NIYOMUKIZA Gratien
