Birazwi ko mu Rwanda nta gikombe cyizwi gihabwa ikipe yabaye iya mbere muri shampiyona, ari nabyo bituma ibikombe bitangwa bihindagurika umwaka ku wundi.
Shampiyona y'umwaka wa 2021-2022 yegukanwe na APR FC nyuma yo gusoza umunsi wa 30 irusha Kiyovu Sports inota rimwe, aho zose zatsinze imikino ya nyuma yazo.
Igikombe cyatanzwe mu 2020-2021
Amakuru dukesha ISIMBI nuko FERWAFA yahaye isoko rimwe mu maduka acuruza ibikoresho bya siporo mu Rwanda kuzana igikombe kizahabwa ikipe izegukana shampiyona, ni mu gihe ibyari mu gihugu byose bari babirebye ntibabishima.
Kubera ko umunsi wa nyuma wa shampiyona wageze kandi ari APR FC na Kiyovu Sports zose zigifite amahirwe, iri duka ryasabwe kuzana ibikombe 2 kugira ngo bishyirwe ku bibuga bibiri.
Nk’uko FERWAFA yari yabitangaje mu gitondo cyo ku wa Kane tariki ya 16 Kamena 2022, ni uko i Muhanga habereye umukino wa Kiyovu Sports na Marines hari igikombe ndetse n’i Nyamirambo ku mukino wa APR FC na Police FC hari ikindi, gusa ngo imiterere y’ibi bikombe ntiyari imwe.
Byaje kurangira APR FC icyegukanye maze icyari i Muhanga cyo kijya mu bubiko bwa FERWAFA cyane ko yari yamaze kukishyura.
Igikombe cya shampiyona cyatanzwe mu mwaka 2021-2022
Kubera ko iki gikombe FERWAFA yatinze kugitumizaho, bikaba ngombwa ko uwagishatse yagishatse vuba vuba akanakizana mu buryo bwihariye kitari mu bindi bicuruzwa yaranguye, byatumye gihenda FERWAFA aho cyageze mu Rwanda gihagaze ibihumbi 750 by’amafaranga y’u Rwanda (ni igikombe APR FC yahawe gusa).
Ndetse amakuru avuga ko ugereranyije n’ibikombe byagiye bitangwa mu myaka itambutse ari cyo gikombe gihenze ndetse kinafite ishusho nziza.
Uretse iki gikombe kandi, APR FC yakegukanye yashyikirijwe sheki ya miliyoni 25 z’amafaranga y’u Rwanda.
Kapiteni Manishimwe Djabel yakira igikombe cya shampiyona 2021-2022(Image:Rwanda Magazine)
