Frank Lampard ashobora guhanwa na FA mbere yo kumanura Everton mu kiciro cya kabiri

Frank Lampard ashobora guhanwa na FA mbere yo kumanura Everton mu kiciro cya kabiri

 Apr 26, 2022 - 07:31

Umutoza wa Everton Frank Lampard ashobora guhabwa ibihano na FA kubera amagambo yatangaje ku musifuzi nyuma yo gutsindwa na Liverpool.

Umutoza Frank Lampard ashobora guhanwa na FA nyuma y'uko yamaze gusabwa ibisobanuro ku magambo yavuze ku musifuzi Stuart Atwell wasifuye umukino batsinzwemo na mukeba wabo Liverpool.

Frank Lampard yatekerezaga ko uyu musifuzi yari kubaha penariti ku munota wa 53 ubwo myugariro wa Liverpool Joel Matip yashyiraga Antony Gordon hasi mu rubuga rw'amahina.

Everton yagerageje kubaza muri PGMOL (abashinzwe imisifurire) impamvu haba hatarakoreshejwe VAR mu kureba niba iriya itari kuba penariti koko. Gusa umubano wa Everton na PGMOL ntuhagaze neza dore ko iyi kipe iherutse no kwimwa indi penariti ku mukino yakinaga na Manchester City.

Lampard avuga ko Everton yari guhabwa penariti(Image:Getty images)

Nyuma y'uyu mukino mu kiganiro n'itangazamakuru umutoza Frank Lampard yatangaje ko iyo aba ari nka Salah washyizwe hasi mu imbere y'izamu rya Liverpool umusifuzi yari kuba yatanze penariti.

Ikinyamakuru Daily mail cyatangaje ko akanama gashinzwe imyitwarire muri FA katangiye kwiga kuri aya magambo ya Frank Lampard, aho ashobora no kuba yagenerwa ibihano.

Nyuma yo gutsindwa uyu mukino ubu ikipe ya Everton iri ku mwanya wa 18 ku rutonde rw'agateganyo rwa Premier league, ikaba ifite amanota 29 nyuma y'imikino 32 imaze gukina. Mu gihe iyi kipe yaba ikomeje gutya mu mikino itandatu isigaye, ishobora kwisanga yamanutse mu kiciro cya kabiri mu gihe Frank Lampard yari yayihawe ngo ayirokore.