Bruno Fernandez ni umwe mu bakinnyi umutoza Erik Ten Hag yubakiyeho ikipe ye kuva yayifata mu mwaka ushize w'imikino, ndetse akaba aherutse no guhabwa igitambaro cyo kuyobora bagenzi be ubwo cyamburwaga Harry Maguire.
Inkuru dukesha ikinyamakuru Fichajes iravuga ko muri shampiyona ya Saudi Arabia harimo amakipe arenze imwe ari gutkereza kuri uyu munya-Portugal, ku buryo mu isoko ryo mu kwa mbere cyangwa mu mpeshyi ashobora kwerekeza muri Manchester United yitwaje amabandari yo kumugura.
Bivugwa ko aya makipe azwiho kugura abakinnyi bafite amazina manini i Burayi, yiteguye kuba yatanga miliyoni 100 z'amayelo, ariko agasinyisha uyu mugabo w'imyaka 29.
Ibi bije nyuma y'uko hasohotse amakuru yemeza ko abahagarariye kompanyi ya PIF izwiho gucuruza ibikomoka kuri peterori, ngo baba bagiye kwegera abahagarariye Bruno Fernandez bagatangira ibiganiro.
Iyi kompanyi ifite uruhare runini mu makipe agera kuri ane yo muri Saudi Arabia, kuko ifite imigabane ya 80% muri Al Nassr, Al Ahli, Al Hilal na Al Ittihad, zose ziri mu makipe akomeye muri iki gihugu.
Muri aya makipe yabo babashije gusinyisha abakinnyi bakomeye barimo Cristiano Ronaldo, Neymar Jr, Karim Benzema, Riyad Mahrez n'abandi binjiyemo mu mpeshyi ishize.
Bruno Fernandez yinjiye muri Manchester United mu 2020 aguzwe miliyoni 60 z'amapawundi ava muri Sporting Lisbon, akaba amaze kuyitsindira ibitego 68 anatanga imipira 57 yavuyemo ibitego mu mikino 201 amaze kuyikinira.
Bruno Fernandez ashobora kujya muri Saudi Arabia
