Iri sanganya ryabaye ku wa mbere w'icyi cyumweru tariki 28 Gashyantare 2022. Abakinnyi batanu ba Al-Malaha baburiwe irengero ubwo ubwato bwarimo iyi kipe bwarohamye ubwo bari mu rugendo bagiye gukina shampiyona y'ikiciro cya gatatu muri El-Metamm muri Sudan.
Ibi byabaye ubwo iyi kipe yari mu rugendo iva mu mujyi wa Shendi yerekeza muri El-Metamm aho yari igiye gukina n'ikipe ya Al-Jarif, nibwo haje kuba iyi mpanuka ubwato burarohama nk'uko bitangazwa na SUNA news agency.
Abakinnyi batanu babuze ni Allah Abdul Qayyum, Al-Mahdi Hassan Al-Awni, Amer Muhammad Saeed, Ammar Muhammad Saeed na Muhammad Fadl Al-Sayyid Abu Arada.
Leta ya Sudan yihanganishije imiryango yabuze abayo muri iyi mpanuka, ndetse igikorwa cyo gushakisha iyo mibiri cyo cyirakomeje.
Ibi si ubwa mbere bibaye muri uyumugezi wa Nile, dore ko ubwato ari kimwe mu bikoreshwa cyane mu gutwara ibintu n'abantu mu buzima bwa buri munsi muri Sudan.
Abantu basaga 120 nibo bivugwa ko baburiye ubuzima mu mugezi wa Nile muri Sudan hagati ya 2018 na 2019. Mu 2018 havuzwe abana 20 b'abanyeshuri barohamye muri uyu mugezi, ndetse mu 2019 abantu 100 nibo byavuzwe ko barohamyemo bari muri gahunda zitandulanye.
Abakinnyi batanu baburiye ubuzima mu mugezi wa Nile(Image:Sky news)
