Amakuru aravuga ko imirwano yabaye ku mukino wahuzaga Queretaro na Atlas zo muri Mexico, yasize abantu 17 bitabye Imana mu gihe abagera kuri 22 bakomeretse.
Ni umukino waberaga ku kibuga cy'ikipe ya Queretaro cyitwa Estadio Corregidora kuri uyu wa gatandatu, aho ku munota wa 62 w'umukino aribwo abafana ba Atlas batanye mu mitwe n'aba Queretaro maze abasifuzi bahitamo guhagarika umukino.
Ubwo abafana binjiraga ikibuga mu mirwano abakinnyi bamwe bahise bakiza amagara yabo bava mu kibuga, mu gihe abandi bagumyemo bagira ngo barebe ko baturisha abo bafana bari bakwiye imishwaro barwana.
Indi mikino yari iteganyijwe muri iyi shampiyona ya Liga MX yakomeje kuri uyu wa gatandatu, ariko nyuma byatangajwe ko imikino yose yari iteganyijwe kuri icyi cyumweru yasubitswe.
Ishyirahamwe ry'umupira w'amaguru muri Mexico ryasohoye ubutumwa bugira buti:"Ishyirahamwe ry'umupira w'amaguru rya Mexico ribabajwe cyane n'isanganya ryabaye kuri uyu mugoroba ku kibuga cya Estadio Corregidora muri Queretaro, mu mukino wahuzaga Queretaro na Atlas.
"Umupira w'amaguru ugomba kuba ahantu h'ubuzima kuri bose aho ihohoterwa iryo ariryo ryose ritemewe.
"FMF igiye kubikurikirana neza mu nzira z'iperereza ku buryo ababigizemo uruhare bazahanwa by'intangarugero"
Mikel Arriola uyobora Liga MX nawe yatangaje ko abagize uruhare mu mutekano mucye kuri iyi sitade bazahanwa ku buryo bukomeye cyane.
Yagize ati:"Abo bagize uruhare mu kubura k'umutekano muri sitade bazahanwa by'intangarugero. Umutekano w'abakinnyi bacu n'abafana nicyo kintu cya mbere"
Ku rundi ruhande ikipe ya Queretaro yari yakiriye uyu mukino nayo yatangaje ko yababajwe cyane n'ibyabaye, ndetse bavuga ko biteguye gutanga ubufasha bwose ku nzego bireba ngo ababigizemo urihare bahanwe.
Imirwano yasize 17 bapfuye abandi 22 barakomereka(Net-photo)
Umukino wahuzaga Queretano na Atlas wahise uhagarikwa(Net-photo)
