Mu kiganiro yagiranye n’ikinyamakuru La Vanguardia, Xavi yavuze ko Perezida wa Barcelona, Joan Laporta, adashaka ko Messi agaruka gukinira iyi kipe yakiniye imyaka myinshi.
Yagize ati: “Leo Messi ntazigera agaruka muri Barcelona, kuko Laporta adashaka ko bigenda gutyo.”
Uyu mutoza wahoze ari umukinnyi w’iyi kipe yahakanye amakuru yavugaga ko shampiyona ya Espagne, La Liga, yaba yarabujije Messi kugaruka, na none kandi ahakana ko Messi n’abamuhagarariye basabye amafaranga menshi kugira ngo basinye amasezerano mashya.
Messi yavuye muri Barcelona muri Kanama 2021 nyuma y’uko ibiganiro byo kongera amasezerano hagati y’impande zombi bitagenze neza. Nyuma yo kuva muri iyi kipe nk’umukinnyi wigenga, yahise yerekeza muri Paris Saint-Germain mbere yo kwimukira muri Inter Miami CF ikina muri shampiyona ya Leta Zunze Ubumwe za Amerika.
Messi ufatwa nk’umwe mu bakinnyi bakomeye babayeho mu mateka ya Barcelona, aho yayifashije kwegukana ibikombe 35 mu myaka 17 yayimazemo byinshi birimo ibya shampiyona ya Espagne na UEFA Champions League.
Umwanditsi: NIYOMUKIZA Gratien
