Iby'iri rondaruhu byabereye muri Anfield aho Liverpool FC yaraye itsindiye ibitego 4 kuri 2 ikipe ya Bournemouth mu mukino wo gufungura Shampiyona y'u Bwongereza, English Premier League, ubwo uyu mukinnyi yatsindaga yishyura ibitego 2 byikurikiranya ikipe ye yari yinjijwe.
Umukino wahagaritsweho gato, ubwo Semenyo yabwiraga umusifuzi, Anthony Taylor, ko hari ibitekerezo by'irondaruhu yigeze kumva bituruka mu bafana mu gice cya mbere cyarangiye ari ibitego 2 kuri buri ruhande.
Polisi ya Merseyside yahise yerekeza aho muri ako gace katurutsemo ibyo bitekerezo by'irondaruhu nyuma y'uko byari bimaze kumenyekana. Uwaketsweho icyo cyaha yaramenyekanye ndetse ahita anasohorwa mu kibuga cyaberagamo uwo mukino kuri ubu akaba yatawe muri yombi nk'uko iki gipolisi cyabihamirije mu itangazo cyashyize hanze uyu munsi ku rubuga rwa X.
Ati: "Twataye muri yombi umugabo w'imyaka 47 y'amavuko ufana Liverpool akaba akekwaho ivanguraruhu muri rubanda nyuma y'uko duhawe amakuru ko Antoine Semenyo ukinira ikipe ya Bournemouth yahohoterewe mu mukino ikipe akinira yahuriyemo na Liverpool ku wa 5 tariki ya 15 Kanama."
Abakinnyi batandukanye b'umupira w'amaguru bihanganishihe uyu mukinnyi wakorewe irondaruhu ryo kuba ari umwirabura, ukomoka muri Ghana.
"Ijoro ryakeye, muri Anfield, rizamporamo iteka ryose atari ukubera amagambo y'umuntu 1 ahubwo ari ukubera umuryango w'umupira w'amaguru wose muri rusange wahagararanye nange." Ni yo magambo Semenyo yahise yandika ku rukuta rwe rwa X, yahoze ari Twitter, ashimira cyane abamubaye hafi muri ibi bihe.
