Ibi byabaye nyuma y’uko Marroc ihawe penaliti mu minota ya nyuma y’inyongera, bituma ikipe ya Sénégal iva mu kibuga mu rwego rwo kwamagana icyemezo cy’umusifuzi, mbere yo kugaruka igakomeza umukino.
Penaliti yatewe na Brahim Diaz hashize iminota 14 itanzwe, ariko ntiyayitsinda. Nyuma y’aho, Sénégal yaje kwegukana igikombe itsinze igitego mu minota y’inyongera cyatsinzwe na Pape Gueye.
CAF yafatiye umutoza wa Sénégal, Pape Thiaw, igihano cyo kudatoza imikino itanu, anacibwa ihazabu y’amadolari ibihumbi 100, ashinjwa imyitwarire itari iya siporo nyuma yo gutegeka abakinnyi be kuva mu kibuga.
Abakinnyi ba Sénégal, Ismaila Sarr na Iliman Ndiaye, bahawe ibihano byo kudakina imikino ibiri kubera imyitwarire mibi bagaragaje ku musifuzi.
Ku ruhande rwa Marroc, kapiteni Achraf Hakimi yahanishijwe kudakina imikino ibiri, umwe muri yo uhagaritswe by’agateganyo mu gihe cy’umwaka umwe, ashinjwa kugerageza gukuraho igitambaro cy’umunyezamu wa Sénégal, Edouard Mendy, mu mvura nyinshi yari iri kugwa.
Ismael Saibari na we yahanishijwe kudakina imikino itatu, anacibwa ihazabu y’amadolari ibihumbi 100 kubera icyaha nk’icyo cyo kwaka isume umunyezamu.
Byongeye kandi, ishyirahamwe ry’umupira w’amaguru rya Marroc ryaciwe ihazabu y’amadolari ibihumbi 200 kubera imyitwarire mibi yaranzwe n’abahereza imipira, imyitwarire y’abakinnyi, gukoresha lasers n’abafana, ndetse n’abakozi binjiye ahakorerwa ikoranabuhanga rya VAR batabifitiye uburenganzira.
CAF yatangaje ko ibi bihano bigamije kurinda icyubahiro cy’umupira w’amaguru muri Afurika no gukumira imyitwarire mibi mu marushanwa akomeye.
Umutoza wa Sénégal, Pape Thiaw yahanishijwe kudatoza imikino itanu
Achraf Hakimi yahanishijwe kudakina imikino ibiri
Umwanditsi: NIYOMUKIZA Gratien
