UCL Final:Vinicius Jr arifuza guhura na Liverpool yuzuye

UCL Final:Vinicius Jr arifuza guhura na Liverpool yuzuye

 May 26, 2022 - 17:41

Umunya-Brazil Vinicius Jr ukinira Real Madrid arifuza guhura na Liverpool yuzuye itarimo ibibazo by'imvune nk'ibikomeje kuvugwamo.

Ni amahirwe Liverpool ibonye yo kwihorera kuri Real Madrid yayitsinze ubwo baheruka guhurira ku mukino wa nyuma wabereye i Kyiv mu 2018 nyuma y'imvune ya Mohamed Salah.

Gusa intero ya Real Madrid ku mukino wa nyuma iba ari gutwara igikombe ndetse nta bwoba itewe na Liverpool, dore ko yageze ku mukino wa nyuma imaze kwirenza amakipe abiri yo muri Premier league.

Muri iyi minsi yegereza uyu mukino Liverpool yavuzwemo amakuru menshi y'imvune aho Mohamed Salah, Thiago Alcantara, Virgil Van Dijk na Fabinho bose bagiye bagira ibibazo.

Ibi byagakwiye kuba inkuru nziza ku b'i Madrid n'abafana ba Real Madrid n'abafana bayo muri rusange, ariko ubwo Vincius Jr yabazwaga ku mvune za Liverpool yasubije ibitandukanye n'ibyo.

Viniscius yagize ati:"Twizere ko bose bazakina. Turifuza umukino mwiza cyane hagati y'amakipe abiri, afite abakinnyi bayo bose. Ijana ku ijana bashyize umutima wabo wose ku mukino. Kandi bombi barwanira ikintu cy'ingenzi kurusha ibindi, aricyo Champions league.

"Tureba imikino ya Liverpool myinshi. Ni ikipe nziza ikomeye kandi ifite imbaraga. Nidushobora guhangana nabyo....tuzatsinda nta kabuza."

Vinicius Jr arifuza guhura na Liverpool yuzuye itabura abakinnyi(Net-photo)

Mu gihe ubushize Real Madrid na Liverpool bari bahuriye i Kyiv muri Ukraine, kuri iyi nshuro barahurira i Paris kuri Stade de France yaherukaga kwakira umukino wa nyuma wa Champions league mu 2006 ubwo FC Barcelona yatsindaga Arsenal ibitego 2-1.

Real Madrid yatangiye uyu mwaka w'imikino igaragara nk'ifite imbaraga nke ariko uburyo yasezereyemo PSG, Chelsea na Manchester City mu mikino yari igoranye, kongeraho igikombe cya La liga byatumye buri umwe yibaza ku ibanga iyi kipe ya Carlo Ancelotti ibitse.

Ni mu gihe Liverpool nayo muri uyu mwaka w'imikino yamaze kubika ibikombe bibiri aribyo FA cup na Carabao Cup, mu gihe babaye aba kabiri muri Premier league barushwa na Manchester City inota rimwe.

Uyu mukino utegerejwe n'abakunzi ba ruhago ku isi yose uteganyijwe ku wa Gatandatu tariki 28 Gicurasi 2022, ukaba uzatangira ku isaha ya saa 21:00.