Kuva imitungo ya Roman Abramovich yafatirirwa mu Bwongereza, ikipe ya Chelsea ntabwo yemerewe gukora ubucuruzi ubwo aribwo bwose harimo no kugurisha amatike, ariko kuri ubu habayemo koroshyamo ku bijyanye no kugurisha amatike.
Byatangajwe ko leta y'Ubwongereza izemera ko amatike agurishwa ku mukino Chelsea izakiramo Real Madrid mu kwa kane muri Champions league, ariko amafaranga akaba atazafatwa na Chelsea dore ko azanakusanywa na UEFA.
Premier league yashyize ubutumwa hanze bugira buti:"Chelsea yasabye ndetse Premier league yemera ko aya mafaranga azatangwa mu bikorwa byo gufasha abagizweho ingaruka n'intambara muri Ukraine. Abazakira aya mafaranga bazatangazwa nyuma y'inyigo izakorwa hamwe n'ikipe."
Minisitiri w'imikino mu Bwongereza Nigel Huddleston nawe yagize ati:"Leta uyu munsi yasubiye mu mabwiriza agenga Chelsea ku buryo abafana bazabasha kugura amatike ku mikino yo hanze, iy'igikombe(FA), n'imikino y'abagore.
"Nashimira abafana mu kwihangana kwabo mu gihe tukiri gukorana n'ubuyobozi bw'umupira w'amaguru ngo bishoboke. Kuva Roman Abramovich yashyirwa ku rutonde rw'abahanwe n'Ubwongereza kubera umubano wabo na Vladimir Putin, twakoze ibishoboka ngo ikipe ikomeze ikine mu gihe ibyo bihano nabyo bishyirwa mu bikorwa."
Hari andi makuru kandi avuga ko ikigero ntarengwa cy'amafaranga Chelsea yemerewe gukoresha ku mukino yaba yongerewe bitari nk'uko byari bimeze mbere, ndetse ibiganiro birakomeje ngo harebwe uko amafaranga ikipe yemerewe gukoresha mu rugendo rw'imikino yo hanze yongerwe.
