FIFA yamaze gutangaza ko yakuye Uburusiya mu mikino yo gushaka itike y'igikombe cy'isi cya 2022, nyuma y'uko komite mpuzamahanga y'imikino Olempike(IOC) yari yasabye ko Uburusiya bwakurwa mu marushanwa nyuma yo gutera Ukraine.
Byari biteganyijwe ko ikipe y'igihugu y'Uburusiya yari kuzakina na Poland tariki 24 Werurwe 2022, mu mikino ya kamarampaka yo gushaka itike y'igikombe cy'isi cya 2022 cyizabera muri Qatar.
Poland yo yari yaramaze gutangaza ko idashaka gukina n'Uburusiya nyuma yo gutera Ukraine, ariko ubwo Poland irahita ikomeza mu cyiciro gikurikira.
Ku rundi ruhande ikipe y'igihugu y'Uburusiya y'abagore ntabwo izakina irushanwa rya Euro 2022 rizabera mu Bwongereza mu mpeshyi, dore ko FIFA na UEFA zemeranyije guhagarika Uburusiya n'amakipe yabo mu marushanwa yabo.
UEFA kandi yamaze gusesa amasezerano yari ifitanye na sosiyete y'Abarusiya ikora ibiva kuri peterori ariyo yitwa Gazprom. Ni imikoranire yatangiye mu 2012, ndetse bivugwa ko UEFA yahabwaga miliyoni zisaga 40 z'amayelo buri mwaka w'imikino.
Ikipe y'igihugu y'Uburusiya y'abagore nyizitabira Euro 2022(Image:The mirror)
Ikipe y'igihugu y'abagabo nayo yakuwe mu mikino yo gushaka itike y'igikombe cy'isi(Net-photo)
FIFA na UEFA zahagaritse amakipe yo mu Burusiya(Net-photo)
