Umuherwe wa Chelsea Roman Abramovic ni umwe mu barusiya bafatiwe ibihano n'igihugu cy'Ubwongereza, ndetse n'imitungo yabo muri iki gihugu ikaba yamaze gufatirwa.
Roman Abramovic wari wamaze gutangaza ko yashyize ikipe ya Chelsea ku isoko nyuma y'uko Uburusiya bwari bwamaze gutera Ukraine, ariko ubu ntabwo yemerewe kugurisha iyi kipe kuko nayo iri mu mitungo ye yafatiriwe.
Iyi kipe byavuzwe ko Roman Abramovic yifuza miliyari 3 z'amapawundi ndetse hari abashoramari batandukanye bari bamaze kugaragaza ko bifuza kugura iyi kipe ariko ubu ntibigishobotse, mu gihe ntagihindutse.
Ibi kandi biraza kugira ingaruka zikomeye ku ikipe ya Chelsea kuko ubu itemerewe gukora ubucuruzi burimo kugurisha amatike. Aha abafana baguze amatike y'umwaka nibo bazitabira imikino isigaye, nta mukinnyi iyi kipe yagura cyangwa ngo igurishe cyangwa ngo yongere amasezerano.
Mu gihe iyi kipe itemerewe kongerera amasezerano abakinnyi, bivuze ko abakinnyi bose bari gusoza amasezerano bazagenda nta kabuza. Abo ni Antonio Rudiger, Andreas Christensen, Cesar Azpilicueta, Saul Niguez ndetse na Charly Musonda.
Nk'uko byatangajwe imikino Chelsea ifite yose izakinwa ndetse n'abakozi bayo bakomeze guhembw, usibye ibikorwa by'ubucuruzi. Ubwo uko bizagenda mu mwaka utaha w'imikino nabyo bizatangazwa.
Imitungo ya Roman Abramovic mu Bwongereza yafatiriwe(Net-photo)
