Ibihembo bya The Choice awards 2021 biteganyijwe gutangwa tariki 15 Werurwe 2022 mu byiciro bigiye bitandukanye mu bitwaye neza mu 2021.
Mutabazi Yves w'imyaka 26 ni umwe mu bakinnyi bahataniye igihembo cya "Most valuable player 2021" cyangwa se umukinnyi wahize abandi mu 2021 mu mikino igiye itandukanye hano mu Rwanda.
Ni umusore wamenyekanye muri Volleyball y'u Rwanda aho yakiniye amakipe nka APR, UTB na Gisagara zose zizwi ko zagiye zigira ibihe byiza mu marushanwa y'uyu mukino w'intoki mu Rwanda, ariko mu 2021 akaba yarakiniraga ikipe ya Al Jazira yo muri Leta zunze ubumwe z'abarabu.
Mutabazi Yves yagaragaye mu bakinnyi bahataniye iki gihembo cy'umwaka wa 2021, nyuma y'uko yafashije ikipe y'igihugu cyane mu gikombe cya Afurika cyabereye mu Rwanda muri uwo mwaka wa 2021.
Iyi mikino y’Afurika mu mukino wa Volleyball mu bagabo yabereye mu Rwanda muri Nzeri 2021, ikipe y’u Rwanda yari mu itsinda A hamwe n’u Burundi, Burkina Faso na Uganda.
Muri iri tsinda, ku munsi wa mbere ikipe y’u Rwanda yatsinze u Burundi amaseti 3-0 (25-15, 25-19 na 25-12) naho Uganda itsinda Burkina Faso amaseti 3-1 (25-15, 25-18, 26-28 na 25-13).
Imikino y’umunsi wa kabiri muri iri tsinda A yabaye tariki 09 Nzeri 2021, ikipe y’u Rwanda yitwaye neza itsinda Burkina Faso amaseti 3-0 (25-14,25-20 na 25-16), ndetse Mutabazi Yves yitwara neza cyane kuko yatsinze amanota 20 yose.
Nyuma yo gutsinda iyi mikino ibiri ikipe y'u Rwanda yahise ikomeza muri kimwe cya kane n'ubwo itabashije kuharenga kuko yatsinzwe na Maroc amaseti atatu ku busa muri iri rushanwa ryegukanwe na Tunisia.
Muri uyu mwaka wa 2021 kandi Mutabazi Yves yahembwe na Nyakubahwa Madam Jeannette Kagame mu rwego rw'urubyiruko rwakoze ibikorwa by'indashyikirwa bigahindura ubuzima bwabo.
Ni igihembo uyu musore yahawe mu muhango wo kwizihiza isabukuru y'imyaka 20 umuryango Imbuto foundation umaze, ukaba ari umuhango wabaye tariki 27 Ugushyingo 2021.
Uyu musore mu kwezi gushize kwa Mutarama nibwo yari yavuzweho amakuru yari yakuye umutima abanyarwanda, aho byavugwaga ko yaburiwe irengero muri Leta zunze ubumwe z'abarabu aho yakinaga mu ikipe ya Al Jazira.
Gusa andi makuru yaje yemeza ko Mutabazi Yves yabonetse kandi ari muzima, ubundi imitima y'abamukunda yongera gusubira mu gitereko.
Ushaka gutora Mutabazi Yves wakanda *544*444*3# cyangwa ugasura urubura www.thechoicelive.com/awards, ukamuha amahirwe yo kwegukana iki gihembo.
Mutabazi Yves yitwaye neza mu gikombe cya Afurika(Net-photo)
Mutabazi Yves yahawe igihembo na Madam Jeannette Kagame(Image:Igihe)
Mutabazi Yves ahataniye igihembo cy'umukinnyi wahize abandi mu 2021.(Thechoice-stock)
