Biravugwa ko ikipe ya Real Madrid iri kwitegura gutanga miliyoni 103 z'amapawundi muri Paris Saint-Germain ishaka Kylian Mbappe muri iyi mpeshyi, mbere y'itariki ya mbere Nzeri ubwo hazafungwa isoko ry'igura n'igurisha.
Mbappe amaze igihe kinini adahisha ko yifuza kuzakinira ikipe ya Real Madrid, ariko kuri iyi nshuro byavuzwe kenshi ko yifuza kuyerekezamo mu mpeshyi ya 2024 ubwo amasezerano ye muri PSG azaba arangiye.
Inkuru dukesha ikinyamakuru Bild cyandikira mu Budage iravuga ko muri Real Madrid bakomeje kubona ko bigoye gukina nta rutahizamu nyuma yo gutakaza Karim Benzema werekeje muri Saudi Arabia, akaba ariyo mpamvu batifuza gutegereza Mbappe undi mwaka.
Nyuma yo kugaragaza ko adashaka kongera amasezerano ahubwo ashaka kuzagendera ubuntu mu mwaka utaha, Mbappe yari yarakuwe mu ikipe ya mbere ariko ubu yamaze kugarurwa ndetse yakinnye umukino wa shampiyona PSG iheruka gukina anatsinda igitego.
Mbappe akenewe i Madrid muri iyi mpeshyi
