RBL All star game:Team Mpoyo yagaritse Team Steve mu mukino wo kuryohereza abafana

RBL All star game:Team Mpoyo yagaritse Team Steve mu mukino wo kuryohereza abafana

 Sep 25, 2022 - 06:34

Mu mukino w'intoranwa z'abakinnyi batoranyijwe mu bitwaye neza muri shampiyona, amakipe yombi yaryohereje abafana atsindana amanota menshi bidasanzwe mu Rwanda.

Ni umukino wabereye muri BK Arena mu birori bikomatanyije byahabereye ku mugoroba wo kuri uyu wa Gatandatu tariki 24 Nzeri 2022, ukaba ari umukino uba usoza umwaka w'imikino muri Basketball ariko ugamije gushimisha abafana.

Warebwe kandi n’abanyacyubahiro batandukanye barimo na Minisitiri wa Siporo, Munyangaju Aurore Mimosa na Perezida w’Ishyirahamwe ry’Umukino wa Basketball mu Rwanda, ariwe Ferwaba, Mugwiza Désiré.

Uyu mukino wari ugizwe n'impande ebyiri zigizwe n'abakinnyi batoranyijwe mu makipe atandukanye yakinnye Rwanda Basketball League muri uyu mwaka, ariko bakaba ari abitwaye neza muri ayo makipe.

Hari hari ikipe yari iyobowe na Mpoyo Axel usanzwe ukinira REG BBC ariyo yanatwaye igikombe cya shampiyona, ikaba yari ihanganye n'ikipe yari iyobowr na Hagumintwali Steve usanzwe ukinira Patriots BBC yatsindiwe ku mukino wa nyuma na REG BBC.

Abakinnyi ba Team Mpoyo: Axel Mpoyo (REG BBC), Kendall Gray (Patriots BBC), Adonis J. Filer (REG BBC), Cleveland Thomas Jr (REG BBC), Nshobozwabyosenumukiza Jean Jacques Wilson (REG BBC), Shyaka Olivier (REG BBC), Sangwe Armel (APR BBC), Kaje Elie (REG BBC), Niyonkuru Pascal (REG BBC), Nkusi Arnaud (APR BBC), Kabare Hubert (IPRC Huye BBC) na Munyeshuri Thierry (Espoir BBC).

Abakinnyi ba Team Steve: Hagumintwali Steven (Patriots BBC), Ndizeye Ndayisaba Dieudonné (Patriots BBC), Ntore Habimana (Patriots BBC), Perriere Steven (APR BBC), Beleck Bell Engelbert (REG BBC), Bush Wamukota (Patriots BBC), Uwitonze Justin (IPRC Kigali BBC), Kubwimana Kazingufu Ally (APR BBC), Aganze Espoir (UGB BBC), Kamondoh Frank (Shoot 4 the stars), Muteba Tresor (Tigers BBC) na Turatsinze Olivier wa IPRC Kigali BBC.

Ugiye kureba ku bakinnyi babanje mu kibuga muri Team Mpoyo ni Axel Mpoyo, Kendall Gray, Adonis J. Filer, Cleveland Thomas Jr na Nshobozwabyosenumukiza Jean Jacques Wilson, naho Team Steve yabanje mu kibuga Hagumintwali Steven, Ndizeye Ndayisaba Dieudonné, Ntore Habimana, Bush Wamukota na Beleck Bell Engelbert.

Abakunzi benshi ba Basketball mu Rwanda bahaga amahirwe menshi Team Mpoyo yo gutsinda uyu mukino kubera abakinnyi bakomeye yari ifite, n'ubwo byari bizwi ko nta hangana rikomeye rizaba ririmo.

Ni umukino wagaragayemo kurekura cyane ubundi abakinnyi bashimisha cyane abawurebaga kubera ukuntu, batsindanaga udukoryo twinshi.

Uyu mukino waje kurangira Team Mpoyo yatozwaga na Benson Oluoch Ogolla itsinze Team Steve yatozwaga na Henri Mwinuka amanota 126-116, bikaba bidasanzwe mu Rwanda ko amakipe yatsindana mu manota ijana kuzamura, byongeye amakipe yombi akaba yarengeje amanota ijana.

Ibi byerekana buryo ki uyu mukino uba wafashwe nk'uwo kwishimisha kurenza uko byaba guhangana, ndetse bikanagaragarira mu buryo baba bakina.

Muri uyu mukino Kendall Gray ni we watsinze amanota menshi aho yasinze  agera kuri 29, Adonis Filer yinjije amanota 28, Nshobozwabyosenumukiza agira 23, aba bose bakaba bari muri Team Mpoyo.

Ni mu gihe muri Team Steve Dieudonné Ndayisaba Ndizeye ariwe winjije amanota menshi aho yinjije amanota 23, agakurikirwa na Hagumintwali Steven winjije amanota 21.

Uyu mukino wabanjirijwe no kurushanwa mu byiciro bitandukanye birimo Slum Dunk yegukanywe na Cleveland Thomas Jr no gutsinda amanota 3 aho Ndizeye Dieudonne yahize abandi.

Amafoto:IGIHE