Tariki 10 Nyakanga 2023 nibwo byemejwe ko umunya-Maroc Youssef Rharb bagarutse mu ikipe ya Rayon Sports, nyuma yo kuyikinira amezi atanu gusa mu 2021 ubwo yari intizanyo y'ikipe ya Raja Cassablanca.
Gusa ayo mezi atanu yari ahagije kugira ngo uyu mwarabu agende yanditse izina rye ku mitima y'abafana ba Murera, basenderewe n'ibyishimo ubwo bamenyaga ko agiye kugaruka akongera akambara ubururu n'umweru.
Ariko kandi iri garuka rye ntabwo ryagenze neza nk'uko byari byitezwe kuko yagizemo ibibazo by'imvine no kuza atameze neza mu ngufu, byatumye atinda kwibona muri bagenzi be agatangira gushyirwa ku gatebe k'abasimbura.
Kuri ubu biravugwa ko uyu musore w'imyaka 23 atishimiye na gato kuba atari guhabwa umwanya wo gukina uhagije, akaba ariyo mpamvu ari mu biganiro n'ubuyobozi bwa Rayon Sports kugira ngo impande zombi zitandukane nta nkurikizi.
Si Youssef Rharb gusa kandi kuko n'umunya-Sudan Eid Abakar Mugadam nawe ukina asatira izamu aciye ku ruhande, nawe ngo ari mu biganiro byo gutandukana n'iyi kipe ku bwo kutabona umwanya wo gukina, ndetse icyemezo kikaba kizafatwa vuba.
Youssef akundirwa na benshi kuba umuhanga cyane mu macenga
