Umwongereza Marcus Rashford ni umwe mu bakinnyi Manchester United iraza kuba igenderaho kuri iki Cyumweru ubwo iraza kuba icakirana na mukeba w'umuturanyi Manchester City.
Ni umukino wa Premier League ugiye kuba nyuma y'imikino ikenda imaze gukinwa amakipe yombi akaba atandukanwa n'amanota atandatu, kuko Manchester United ifite amanota 15 mu gihe Manchester City yo ifite amanota 21.
Uyu mukino umaze kujya mu mitwe y'abakunzi ba ruhago nk'umukino ukomeye cyane cyane kuva mu kinyacumi gishize ubwo Manchester City yari itangiye kwigaragaza ku ruhando rw'amakipe akomeye mu Bwongereza.
Gusa uyu siwo mukino gusa utwara Manchester United imbaraga nyinshi haba ku mubiri no mu bitekerezo by'abakinnyi n'abafana. Loverpool isanzwe izwi nk'umukeba wa Manchester United mu Bwongereza, dore ko ari nayo makipe yegeranye ku bigwi muri iki gihugu.
Ubwo Marcus Rashford yaganiraga na Gary Neville yabajijwe ikipe yanga cyane hagati ya Liverpool na Manchester City, uyu musore ntiyariye indimi avuga ikipe itozwa na Jurgen Klopp n'ubwo avuga ko zose azanga.
Rashford ati:"Liverpool, nta n'imwe nkunda murizo, ariko nanga Liverpool cyane. Ni Liverpool, iminsi yose."
N'ubwo Rashford amaze gutsinda Liverpool ibitego bitandatu, ariko uyu musore ntabwo akunze kuyigiriraho ibihe byiza, kuko amaze gutsinda imikino itatu gusa mu mikino 15 amaze guhuramo nayo.
Manchester City ni mukeba wa Manchester United ahanini bitewe n'uko ari abaturanyi ariko iyi kipe ntiyakunze kuyigora mu bihe bya Sir Alex Ferguson, ari nabwo twavuga ko Amashitani y'umutuku yari mu bihe byayo byiza.
Gusa Liverpool yo yari ikibazo gikomeye kuko uyu mutoza w'umunya-Scotland yaje muri Manchester United irushwa na Liverpool ibikombe 11 bya shampiyona, ariho yahereye ayigaranzura agasiga Manchester United ibarusha bibiri.
Gusa kuva Rashford yazamurwa mu ikipe ya mbere ysanze ari Liverpool na Manchester City ari amakipe akomeye. Liverpool yabatsinze kenshi ndetse itwara ibikombe bikomeye birimo Premier League na UEFA Champions League, kandi na Manchester City ni uko.
Rashford ahamya ko Liverpool ariyo yanga kurenza Manchester City baturanye
