Mu rukerera rwo kuri uyu wa Gatatu tariki 5 Nyakanga 2023, nibwo Perezida Kagame yageze mu Murwa Mukuru wa Trinidad and Tobago Port of Spain, aho yitabiriye inama ya 45 isanzwe y’Abakuru ba Guverinoma z’ibihugu bigize Umuryango CARICOM ho muri Karayibe nk’umwe mu batumirwa Mpuzamahanga.
Iyi nama yatangiye ku wa 03-05 Nyakanga, abayitabiriye bari kurebera hamwe ibijyanye no kwihaza mu biribwa ndetse n’ingamba zafatwa mu guhangana n’imihindagurikire y’ibihe.Ari nako iyi nama kandi yahuriranye n’umuhango wo kwizihiza imyaka 50 ishize uyu muryango wa CARICOM ushinzwe.
Perezida Kagame ari muri Trinidad and Tobago
Perezida Kagame yatumiwe muri iyi nama nyuma y’uko u Rwanda rutangiye gushimangira umubano n’ibihugu byo muri Caraïbes binyuze mu nziduko z’akazi aheruka kugirira muri Jamaica na Barbados.
Aha muri Jamaica Perezida Kagame akaba aherukayo muri Mata 2022 ari nako muri Gicurasi 2023 yagiranye ibiganiro na Perezida Irfaan Ali uyobora Guyana iri mu bihugu bigize uyu muryango, bemeranya ku guteza imbere ubutwererane hagati y’ibihugu byombi.
Perezida Kagame ari muri Karayibe
Uretse Perezida Kagame kandi witabiriye iyi nama, mu bandi batumiwe harimo: Umunyamabanga Mukuru wa Loni, Antonio Guterres; Umunyamabanga wa Leta Zunze Ubumwe za Amerika ushinzwe Ububanyi n’Amahanga, Anthony Blinken na Minisitiri w’Intebe wa Koreya y'Epfo.
Magingo aya, uyu muryango wa CARICOM ugizwe n’ibihugu birimo Antigua and Barbuda, Bahamas, Barbados, Belize, Dominica, Haiti, Jamaica, Grenada, Guyana, Montserrat, St. Lucia, Suriname, St. Kitts and Nevis, St. Vincent and the Grenadines na Trinidad and Tobago.
