Papa wa Roberto Firmino, José Roberto Cordeiro de Oliveira, yitabye Imana ku myaka 62 azize uburwayi bw'umutima.
Uyu mugabo yarwaye muri iki cyumweru ubwo we n'umuryango we bari bafashe urugendo rwerekeza i Dubai mu biruhuko n'umuryango we, harimo na Roberto Firmino, akaba ari naho yaguye.
Aya ni amakuru yatangajwe bwa mbere n'ikinyamakuru cyo muri Brazil cyitwa UOL, aho abajyanama n'inshuti za Firmino aribo bemeje ayo makuru, umuryango we ukaba ukomeje gukorana na ambasade ya Brazil muri Leta zunze ubumwe z'abarabu ngo umurambo ujyanwe iwabo.
Mu mpeshyi ishize nibwo Roberto Firmino yavuye muri Liverpool yari amazemo imyaka umunani, akaba ari umwe mu bakinnyi ba nyuma iyi kipe yasinyishije mbere y'uko ifatawa na Jurgen Klopp mu 2015.
Uyu mugabo w'imyaka 32 yayitsindiye ibitego 111 mu mikino 362 yayikiniye, ndetse ayifasha gutwara ibikombe bikomeye nka UEFA Champions League na English Premier League.
José Roberto Cordeiro de Oliveira yari kumwe n'umuryango we i Dubai
