Umuzamu Maxime Wenssens w'imyaka 21 yonyine ari mu bakinnyi bane bongewe ku bakinnyi 30 bari bahamagawe mu Amavubi mbere, bakomeje kwitegura imikino ibiri yo gushaka itike y'igikombe cy'isi iri mu minsi mike iri imbere.
Uyu musore ukinira ikipe ya Royal Union Saint-Gilloise ikina ikiciro cya mbere mu Bubiligi, afite se w'umubiligi na nyina w'umunyarwandakazi, bimwemerera kugira ubwenegihugu bw'ibyo bihugu byombi.
Uyu ni umwe mu basore baganirijwe n'umunya-Espagne Carlos Alôs Ferrer uherutse gutandukana n'Amavubi mu rugendo yakoreye i Burayi, none kuri iyi nshuro yahamagawe ndetse yemera gukinira u Rwanda muri iyi mikino yo gushaka itike y'igikombe cy'isi.
U Rwanda ruzakina umukino wa mbere tariki 15 Ugushyingo rwakira Zimbabwe, naho tariki 21 Ugushyingo u Rwanda nanone rwakire Afurika y'epfo, akaba ari amakipe yose ahuriye mu itsinda C muri iyi mikino yo gushaka itike y'igikombe cy'isi.
Maxime Wenssens yemeye gukinira Amavubi
