Sosiyete Sivile ikorera muri Repubulika Iharanira Demokarasi ya Congo muri Teritwari ya Nyiragongo, iravuga ko abarwanyi ba M23 nta hantu bigeze bajya, kuko bakibarizwa muri ako gace mu buryo bwo kwiyoberanya.
Iyi sosiyete Sivile, ikomeza ivuga ko ”abibwira ko M23 yasubiye inyuma ikava muri Teritwari ya Nyiragongo muri gurupoma ya Kibumba na Buhumba bibeshya, ngo kuko abarwanyi b’uyu mutwe bakuyemo impuzankano za gisirikare bambara imyenda ya gisivile.'”
Ku bw'ibyo, hari abandi bantu batuye mu gace ka Kibumba, babwiye itangazamakuru ryo muri DRC ko “Abarwanyi ba M23 bakiri muri ako gace ku bwinshi ndetse ko bivanze n’Abaturage, mu gihe bategereje guhabwa andi mabwiriza.”
Ikindi kandi hakaba hashize iminsi umutwe wa M23 uvuye ku mugaragaro muri gurupoma ya Kibumba na Buhumba ho muri Teritwari ya Nyiragongo, mu rwego rwo kubahiriza imyanzuro y’Abakuru b’Ibihugu byo mu Karere, yafatiwe mu biganiro bya Luanda na Nairobi igamije gushakira DRC amahoro.
Nubwo Sosiyeti Sivire ivuga ibi byose, Ubuyobozi bw’Ingabo za EAC zasigiwe ubugenzuzi bwo kuba bari kugenzura Kibumba na Buhumba, bwemeza ko M23 itakibarizwa muri utwo duce nk’uko bamwe mu Banye-Congo babivuga, kuko uyu mutwe wasubiye inyuma akabari arizo zisigaye zitugenzura utwo duce.
Ikindi kandi umutwe wa M23 ntiwemeranya n’ibikunze gutangazwa na za Sosiyete Sivile zo muri DRC, kuko ngo zahindutse ibikoresho bya Guverinoma y’iki gihugu mu rwego rwo kuwuharabika no kuwusiga icyashya.
Magingo aya, nubwo umutwe wa M23 ukomeje kurekure ibice wari warafashe, ariko Guverinoma ya DR-Congo itangaza ko nta biganiro by'amahoro izagirana n'uyu mutwe.
Nyamara nubwo Leta ya Congo ivuga ko itazagirana ibiganiro n'uyu mutwe, ariko amasezerano ya Nairobi na Luanda yavugaga ko M23 nisubira inyuma bazagirana ibiganiro by'amahoro.
Ntakabuza abantu bakomeje gutegereza icyo M23 izakora mu gihe Leta ya Congo yakomeza kwanga ibiganiro by'amahoro.
