Lionel Messi yegukanye Ballon d'or ya 7

Lionel Messi yegukanye Ballon d'or ya 7

 Nov 29, 2021 - 19:04

France football yatanze igihembo cya Ballon d'or yo mu mwaka wa 2021

Ni Ballon d'or yari itanzwe ku nshuro ya 65 kuva yatangira gutangwa aho usanga yiharirwa n'abakinnyi bakina i Burayi.

Ni ibirori byayobowe n'umunyabigwi w'ikipe ya Chelsea Didier Drogba aho byabereye kuri Théâtre du Châtelet mu Bufaransa nk'uko bisanzwe bikorwa.

Abakinnyi bari bahatanye ari benshi ariko abahabwaga amahirwe cyane ni nka Jorginho,Karim Benzema,Lionel Messi na Robert Lewandowski wabaye umwataka w'umwaka.

Robert Lewandowski niwe wabaye rutahizamu w'umwaka(Image:433)

Ballon d'or yaherukaga gutangwa yatanzwe mu 2019 dore ko mu 2020 itatanzwe ku mpamvu za Covid-19 nk'uko byatangajwe n'abatanga iki gihembo.

Robert Lewandowski yatsinze ibitego byinshi muri uyu mwaka aho yanakuyeho agahigo ka Gerd Muller ko gutsinda ibitego byinshi muri Bundesliga agatsinda ibitego 42 muri uyu mwaka.

Ku ruhande rwa Lionel Messi we yabaye umukinnyi watsinze ibitego byinshi muri La liga atsinda ibitego 30 ndetse anafasha ikipe ye y'igihugu gutwara Copa America ayifatiye runini.

Lionel Messi n'umuryango we bari babukereye(Image:Goal)

Jorginho we yafashije ikipe ye ya Chelsea gutwara UEFA champions league ndetse mu ikipe y'igihugu atwara Euro2020 aho Abatariyani batsinze Abongereza.

Ni Ballon d'or ya karindwi uyu munya-Argentina yegukanye dore ko yari asanzwe afite esheshatu akaba ntawundi mukinnyi banganya kuko mugenzi we Cristiano Ronaldo afite eshanu.

Uko batatu ba mbere bakurikiranye(Image:433)

Lionel Messi yabaye uwa mbere,Robert Lewandowski aba uwa kabiri mu gihe Jorginho yabaye uwa gatatu.