Wari umukino wa nyuma wa CAF Champions league wahuje Al Ahly yo mu Misiri na Wydad Cassablanca yo muri Maroc, ukaba wabereye kuri stade Mohamed V yo muri Maroc..
Ibi byabanje no guteza impaka zikomeye kuko abo muri Al Ahly batumvaga ukuntu bagiye gukina n'ikipe yo muri Maroc, bakaba bagomba no gukinira uwo mukino wa nyuma muri Maroc.
Bwari ubwa mbere umukino wa nyuma wa CAF Champions wemerewe kurebwa n'abafana nyuma ya Covid-19 yadutse mu 2019 igaca abafana ku bibuga.
Gusa ku rundi ruhande wari umukino utoroshye ku ruhande rwa Wydad Cassablanca, kuko Al Ahly y'umutoza Pitso Mosimane yashakaga gutwara CAF Champions league ku nshuro ya gatatu yikurikiranya.
Wydad Cassablanca yinjiye mu mukino neza ndetse ku munota wa cumi gusa rutahizamu w'umunya-Congo Brazzavile witwa Guy Mbenza arekura umupira ari inyuma y'urubuga rw'amahina ariko umupira ukubita ipoto uvamo.
Gusa nyuma y'iminota ine yonyine nibwo Wydad Cassablanca yabonye igitego cya mbere cyatsinzwe na Zouheir El Moutaraji, nyuma yo kwinjira ava ku ruhande arekura ishoti, umuzamu Mohamed El Shenawy ntiyamenya uko bigenze.
Zouheir El Moutaraji niwe watsindiye Wydad Cassablanca(Image:Goeal)
Nyuma y'iyi minota Al Ahly yagarutse mu mukino ndetse irusha Wydad Cassablanca ariko kubona igitego cyo kwishyura biranga, ndetse bajya kuruhuka Wydad Cassablanca ikiri imbere n'igitego kimwe ku busa bwa Al Ahly.
Bavuye kuruhuka Al Ahly yatangiye yataka ariko ntibyayihira kuko Wydad Cassablanca yayitanze kubona igitego. Ni umupira abasore ba Wydad Cassablanca bazamukanye bihuta cyane nyuma y'iminota ine igice cya kabiri gitangiye, Zouheir El Moutaraji ahita atsinda igitego cya kabiri.
Ikipe ya Al Ahly yakomeje kugerageza kureba ko yagaruka mu mukino ibinyujije mu bakinnyi bayo barimo umunyafurika y'epfo Percy Tau, ariko umuzamu wa Wydad witwa Ahmed Reda Tagnouti agenda ababera ibamba.
Wydad Cassablanca yabujije Al Ahly gutwara CAF Champions league ya gatatu yikurikiranya, mu gihe ari ubwa gatatu Wydad nayo itwaye iki gikombe. Ubwa mbere Wydad Cassablanca yagitwaye mu 1992, yongera mu 2017, ndetse n'icyo yaraye itwaye cyiba icya gatatu, mu gihe yakinaga na Al Ahly imaze kugitwara inshuro icumi zose.
Wydad Cassblanca yegukanye CAF Champions league 2022(Net-photo)
